Öðrum degi aðalmeðferðar í Höfðatorgsmálinu, þar sem þrír menn eru sakaðir um tilraun til manndráps í bílakjallara í Reykjavík í mars, lauk síðdegis. Vitni í málinu og lögreglumenn gáfu skýrslu í dag sem og lögreglumenn sem komu að rannsókn þess.
Sakborningur var í bílstjórasætinu en skipti síðan við annan
Skýrslutökur byrjuðu brösulega í morgun þar sem fyrsta vitnið sem kallað var til átti erfitt með að finna héraðsdóm. Um hálftíma eftir að aðalmeðferðin átti að hefjast mætti vitnið og skýrslutökur gátu hafist.
Vitnið lýsti því að hafa orðið mjög hræddur þegar átökin byrjuðu og sagðist hafa séð fólk slást, óviðeigandi hegðun og einhverja með kylfur. Hann sagðist ekki hafa orðið vitni að því þegar keyrt var á brotaþola.
Á eftir honum kom ungur maður sem sagðist hafa séð slagsmál og þekkt sakborninginn sem er ákærður fyrir að hafa ekið á brotaþola á miklum hraða. Hann sagði það sama og önnur vitni sem komu í dómsal í dag, að hann færi þarna í þennan bílakjallara til að „tjilla“. Annað vitni sagði að þarna hittist fólk, til dæmis þegar það er vetur eða rigning úti.
Vitnið var spurt út í einn þeirra þriggja sem ákærðir eru. Sá er grunaður um að hafa stungið brotaþola í rasskinnina. Vitnið sagðist ekki hafa séð hann með vopn en að hann hafi alltaf verið með tannbursta á sér. Sá sagðist við skýrslutöku í gær hafa verið með afrískan tannbursta sem hann hafi notað til að róa sig niður þegar hann var stressaður.
Vitnið sagði tannbursta sem þennan ekki bara afríska, heldur séu þeir einnig notaðir í Sádi-Arabíu.
Upptaka úr bílakjallaranum umrætt kvöld var spiluð oft í dómsal í dag. Saksóknari spilaði upptökuna fyrir vitnið sem sést hlaupa að hvítum Land Rover sem notaður var til að keyra á brotaþola. Vitnið fer inn í bílinn en stuttu síðar fer hann aftur út og hleypur í burtu.
Vitnið sagði sakborninginn sem grunaður er um að hafa keyrt á brotaþolann hafa verið í bílstjórasætinu en hann hafi síðan skipt við einhvern sem sat í þar og sá fór í bílstjórasætið. Vitnið segist ekki hafa rætt við bílstjórann.
Vitnið sagðist ekki hafa séð þegar keyrt var á brotaþola en heyrt hljóðið. Á upptökunni sést að minnsta kosti einn þeirra sem var í bílakjallaranum um kvöldið sprauta úr slökkvitæki. Vitnið sagði allt hafa verið hvítt og því hafi hann aðeins heyrt þegar ákeyrslan varð. Hann sagðist ekki muna hvar hann hafi verið staddur í bílakjallaranum þegar atvikið varð og að hann hafi verið á röngum tíma og röngum stað.
Algengt að „tjilla“ í bílakjallaranum
Næsta vitni sagðist hafa verið með vini sínum í bílakjallaranum, hann væri vanur að fara þangað og „tjilla.“ Hann sagðist ekki hafa vitað af átökunum og að engin sérstök ástæða hafi verið fyrir því að hann var þar á þessum tíma.
Í skýrslutökunni sagðist hann þó hafa séð sakborninginn sem grunaður er um að hafa keyrt Land Rover-inn undir stýri rétt eftir árásina.
Skýrslutökur gengu hratt eftir seinkunina í upphafi og hvert vitnið á fætur öðru kom inn í dómsal að segja frá sinni aðkomu og upplifun að málinu. Upptakan úr öryggismyndavélum bílakjallarans var spiluð oft og vitnin staðfestu á hvaða bílum þau voru á og hvenær þau komu og fóru úr bílakjallaranum.
Það er þó rauður þráður í gegnum frásagnir þeirra allra að þeir hafi ekki vitað af átökunum, komi oft í bílakjallarann til að hanga og hitta aðra og viti ekki mikið af smáatriðum.
Eitt vitni sagðist hafa farið í bílakjallarann til að sækja son vinar síns. Hann búi nálægt bílakjallaranum og því hafi hann farið. Hann sagðist ekki hafa farið þangað hefði hann vitað af átökunum. Það væri kommon sens. Hann Hann myndi ekki fara til að skapa vandræði.
„Ég kom ekki nálægt þessu, vissi ekki að atvikið væri að gerast, ég bý nálægt og sótti strákinn því hann er ekki með bílpróf.“
Hann sagðist hafa búið hér í sex ár og ekki lent í neinum vandræðum hingað til.
Næsta vitni sagðist vera vanur að fara í bílakjallarann en ekki hafa vitað af átökunum. Hann sagðist ekki hafa séð mikið, þrír einstaklingar hafi komið að bílnum hans með kylfur og sagt þeim sem voru í bílnum að fara. Þeir hafi verið grímuklæddir og bent með höndunum.
Hann sagðist hafa séð hvítan jeppa en ekki hver hafi keyrt hann.
Á eftir honum kom einn þremenninganna sem komu í bílakjallarann, að því er virðist til að jafna sakir. Annar þremenninganna er brotaþoli sem var keyrt á og stunginn í rasskinnina.
Lítið var að hafa upp úr honum. Hann sagðist ekki vita hvort hann væri komin þangað til að jafna sakir né hvort hann hafi verið með eggvopn, þó að upptakan úr öryggismyndavélunum hafi verið spiluð og þar hafi sést í hann ganga inn í bílakjallarann með handboltakylfu í hönd.
Segir að það hafi verið keyrt á sig í tvígang – upptökur sýna bara aðra ákeyrsluna
Þegar skýrslutaka hafði verið tekin af vitnum sem létu sjá sig í dómsal var komið að því að lögreglumenn gæfu skýrslu.
Fyrstur til að gefa skýrslu var lögreglumaður sem var falin rannsókn málsins. Hann sagði töluverðan fjölda lögreglumanna hafa komið að því. Lögreglumaðurinn var spurður út í vettvang í bílakjallaranum. Hann sagði fleiri bíla hafa sést á upptökum úr öryggismyndavélum en nefndir hafi verið í skýrslu málsins.
Verjandi eins þremenninganna sem ákærðir eru í málinu, þess sem grunaður er um að hafa stungið brotaþola í rasskinnina, spurði stíft út í mat lögreglu. Hún sagði sakborninginn hafa verið með eggvopn en hann vill sjálfur meina að þetta hafi verið afríski tannburstinn. Aðspurður hvort lögregla geti útilokað að þetta sé tannburstinn en ekki vopn sagðist lögreglumaðurinn ekki ætla að leggja mat á það og vísaði aftur í mat lögreglu að þetta hafi verið eggvopn.
Lögreglumaðurinn sagði að lögregla hafi greint fleiri vopn, meðal annars barefni, kylfur og eggvopn á upptökunum.
Brotaþoli hefur borið fyrir sig að keyrt hafi verið á hann í tvígang en upptökur eru ekki í öllum bílakjallaranum. Lögregla hafði því ekki upptökur af fyrri ákerslunni. Tvær aðrar bifreiðar, fyrir utan Land Rover-inn voru skoðaðar við rannsókn málsins en þar fannst ekki erfðaefni úr brotaþola eða öðrum sakborningum. Fyrir dómi kom fram að lögregla dragi frásögn brotaþola ekki í efa.
Einnig kom fram við skýrslutökuna að Land Rover-inn hverfi úr mynd í 30 til 40 sekúndur rétt áður en hann sést á upptöku keyra á brotaþola. Lögregmaðurinn sagði ekki hægt að útiloka að bíllinn hafi stoppað áður en ákeyrslan átti sér stað. Sakborningurinn hefur sjálfur neitað því að hafa verið undir stýri þegar keyrt var á brotaþola en lögreglumaðurinn segir framburð hans hafa verið á marga vegu í gegnum rannsóknina.
„Hann var bara mjög augljóslega kvalinn“
Næstu lögreglumenn sem gáfu skýrslu lýstu atburðarrásinni eftir að tilkynnt var um atvikið. Lögregla fékk tilkynningu um að tveir hafi orðið fyrir líkamsárás og þegar lögregla kom á vettvang lá einn með blæðandi sár á rasskinninni. Lögregla var smá stund að átta sig á hvar hann var staðsettur í bílakjallaranum en þegar hann fannst blæddi úr læri hans og hann var með stungusár á vinstri rasskinn.
Annar lögreglumaður stóra dæld hafa verið á vélarhlíf hvíta Land Rover-sins og í að honum hafi fundist kylfa og blóð. Þriðji lögreglumaðurinn sem kom fyrir dóm var í bílnum sem veitti Land Rover-num eftirfylgd eftir atvikið og sá að hvítum poka hafði verið kastað úr bílnum á ferð. Þegar mennirnir í bílnum höfðu verið handteknir fór hann aftur á vettvang og náði í pokann. Í honum fannst fatnaður, meðal annars tvær húfur og buff.
Fjórði lögrelgumaðurinn sagðist sjá brotaþola liggja í blóðpolli upp við vegg á -2. hæð bílakjallarns. Annar ökkli hans var mikil aflagaður og við skoðun fannst stungusár á annarri rasskinninni.
„Hann var bara mjög augljóslega mjög kvalinn,“ sagði lögreglumaðurinn. Næsti lögreglumaður til að gefa skýrslu tók undir þetta og sagði brotaþola hafa verið meðvitunarlítinn.
Skýrslutökur yfir vitnum, læknum og fleirum heldur áfram á morgun. Aðalmeðferðinni lýkur á föstudag með málflutningi verjenda og saksóknara.
