Oddviti Samfylkingarinnar í bæjarstjórn Reykjanesbæjar gagnrýnir starfshætti Vilhjálms Árnasonar sem ráðinn var bæjarstjóri í gær. Gagnrýnir oddvitinn eins og oddviti Framsóknarflokksins að ekki hefði áður verið gengið frá ráðningarsamningi við Vilhjálm en einnig að nýi bæjarstjórinn hafi á fundinum beitt sér fyrir breytingu á bæjarmálasamþykkt án þess að bera það undir minnihlutann. Furðar oddvitinn sig einnig á því að Vilhjálmur hafi að loknum fundi bæjarstjórnar farið út úr ráðhúsinu og dregið fána bæjarins niður af flaggstöng sem þar er en dregið í staðinn upp íslenska fánann. Vilhjálmur vakti raunar sérstaklega athygli á því að hann hefði dregið íslenska fánann að húni að fundinum loknum.
Guðný Birna Guðmundsdóttir er oddviti Samfylkingarinnar í bæjarstjórn Reykjanesbæjar. Flokkurinn var í meirihluta á síðasta kjörtímabili en er nú í minnihluta. Í nýrri Facebook-færslu gagnrýnir Guðný Birna eins og Halldóra Fríða Þorvaldsdóttir oddviti Framsóknarflokksins, sem einnig er í minnihluta, hafði gert á fundi bæjarstjórnar í gær, að samþykkt hefði verið að ráða Vilhjálm sem bæjarstjóra án þess að fyrir lægi ráðningarsamningur.
Um ráðninguna skrifar Guðný:
„Leggja á fram gögn um ráðninguna í bæjarráði á fimmtudag sem síðan fer þá aftur til bæjarstjórnar til samþykktar. Skrítin vinnubrögð og óþarft að leggja slíkt fram í gær enda kusu bæjarfulltrúar Samfylkingar og Framsóknar gegn málinu þar sem óábyrgt er að staðfesta ráðningu sem ekkert er vitað um, hvorki launakjör, önnur kjör, uppsagnarákvæði né nokkuð annað.“
Eftir að ráðning Vilhjálms var samþykkt á fundi bæjarstjórnar tók hann til máls og sagði meðal annars að hann vildi vera bæjarstjóri allra bæjarfulltrúa. Miðað við orð Guðnýjar er ljóst að sú viðleitni byrjar ekki vel gagnvart minnihlutanum:
„Nýkrýndur bæjarstjóri tók það svo upp með sjálfum sér að gera sjálfur breytingar á bæjarmálasamþykkt án aðkomu þverpólitískrar forsetanefndar sem sér formlega um allar breytingar á samþykktinni. Byrjar vel.“
Augljóst er að Guðný Birna meinar hér orðin „byrjar vel“ í kaldhæðni.
Segir Guðný Birna að umræddar breytingar hafi snúist um að gera breytingar á nefndum og að tilnefna embættismann til að vera varabæjarstjóri í stað formanns bæjarráðs líkt og áður. Hún nefnir ekki hver umræddur embættismaður sé en ekki er ólíklegt að þar sé um að ræða bæjarlögmann:
„Það er greinilega þétt samstarf og traust milli fimm manna sjálfstæðisflokks og eins manns miðflokks sem er reyndar eini miðflokkurinn á Íslandi sem komst í meirihluta. Sem sagt, á fyrsta fundi, lagt fram ráðningu sem enginn veit neitt um og krotað track changes í leiðarvísi bæjarstjórnar. Merkilegt nokk.“
Íslenski fáninn og Reykjanesbær
Guðný furðar sig að lokum á því sem Vilhjálmur tók upp á eftir að bæjarstjórnarfundinum lauk:
„Svo í lok fundar tók nýi bæjarstjórinn niður fána Reykjanesbæjar til að flagga íslenska fánanum. Ég veit eiginlega ekki hvað er best að segja þannig að ég upplýsi bara í staðinn. Vona að þið eigið bara geggjaðan dag.“
Í gærkvöldi eftir að bæjarstjórnarfundinum lauk vakti Vilhjálmur raunar sérstaka athygli á því í Facebook-færslu að hann hefði dregið íslenska fánann að húni um leið og hann fagnaði því að vera formlega orðinn bæjarstjóri:
„Í kosningabaráttunni lofuðum við því að íslenski fáninn yrði dreginn að húni við Ráðhús Reykjanesbæjar á fyrsta degi nýs meirihluta. Að loknum bæjarstjórnarfundinum gengum við því út og efndum það loforð.“
Á myndinni af Vilhjálmi draga íslenska fánann að húni er fáni Reykjanesbæjar ekki sjáanlegur. Á myndinni er aðeins að sjá eina flaggstöng fyrir framan ráðhúsið. Á mynd af ráðhúsinu á Já.is má sjá fjórar flaggstangir og allar með fána Reykjanesbæjar en óljóst er hvort það sé venjan að flagga alltaf fána bæjarins á þeim öllum. Sú mynd er hins vegar augljóslega eldri en myndin sem tekin var af Vilhjálmi í gær en ekki sést í hinar flaggstangirnar á þeirri mynd.
Í myndbandi á Facebook-síðu Sjálfstæðisflokksins er einnig vakin sérstök athygli á að íslenski fáninn hafi verið dreginn að húni við ráðhúsið og þar er fylgst með Vilhjálmi gera það. Á myndbandinu sést í tvær aðrar flaggstangir og á annarri þeirra er greinilega fáni en það sést ekki hvaða fána er um að ræða. Ungur Sjálfstæðismaður sem kynnir sig ekki með nafni orðar í myndbandinu loforðið um flöggun íslenska fánans eilítið öðruvísi en Vilhjálmur:
„Við lofuðum því að flagga íslenska fánanum frá fyrsta degi og hér er Villi Bæjó að klára það.“
Undir myndbandinu hljómar tónlist en þó ekki þjóðlegt ættjarðarljóð heldur lagið Fortunate Son með bandarísku hljómsveitinni Creedance Clearwater Revival en í laginu, sem kom út 1969, er deilt á stríðrekstur Bandaríkjanna í Víetnam og það að menn úr vel stæðum fjölskyldum með góð sambönd hefðu sleppið við herskyldu og þar með að vera sendir í stríðið. Í athugasemd er Sjálfstæðismönnum bent á að í ljósi texta lagsins sé þetta eilítið óheppilegt lagaval:
„Fjallar um falska þjóðerniskennd þeirra sem veifa fánanum en bera enga raunverulega byrði.“
