Diljá Mist Einarsdóttir, þingmaður Sjálfstæðisflokksins, segir það segja sína sögu að Þorgerður Katrín Gunnarsdóttir utanríkisráðherra ráðist endurtekið að Morgunblaðinu. Segist hún hrædd um að ráðherrann myndi ekki telja slíka framkomu til fyrirmyndar ef hún kæmi frá Donald Trump Bandaríkjaforseta.
Þetta skrifar Diljá á Facebook-síðu sinni þar sem hún setur út á ummæli utanríkisráðherra í samtali við Vísi í dag þar sem Þorgerður sakaði Morgunblaðið um að ganga erinda hagsmunafla með þvi að fjalla um umræður á hollenska þinginu um mögulegar aðildarviðræður Ísland við Evrópusambandið.
Í umræðum á hollenska þinginu í seinasta mánuði staðfesti Rob Jetten forsætisráðherra að afstaða hollensku ríkisstjórnarinnar væri sú að ríki sem vildu ganga inn í Evrópusambandið þyrftu að undirgangast sameiginlega fiskveiðistefnu sambandsins.
Óskandi að gagnrýni yrði svarað málefnalega
Segir Diljá að það væri óskandi að ESB-aðildarsinnar myndu svara gagnrýni málefnalega og efnislega í stað þess að grípa til útúrsnúninga og dylgja.
Í viðtalinu við Vísi sagði Þorgerður að það sem hefði komið fram í umræðunum á hollenska þinginu væri ekki í samræmi við sín eigin samtöl við Jetten.
„Eftir ítrekaðar beiðnir okkar í stjórnarandstöðu utanríkismálanefndar, fengum við þó afhent yfirlit yfir samskipti utanríkisráðherra og þar koma hvergi fram samskipti við forsætisráðherra Hollands að ég fæ best séð,“ skrifar Diljá.
Líti illa út fyrir Þorgerði
Segir Diljá það líta illa út fyrir utanríkisráðherra að saka fjölmiðill um annarleg sjónarmið og hagsmunatengsl fyrir það eitt að birta staðfesta og sanna frétt og vekja athygli á umræðum sem þessum.
„Að utanríkisráðherra skuli endurtekið ráðast þannig að einum fjölmiðli og neita að standa þar fyrir máli sínu segir sína sögu. Ég er hrædd um að henni þætti slík framkoma t.a.m. hjá Trump ekki til fyrirmyndar,“ skrifar þingmaðurinn.
