Samruni kvikmyndaveranna Warner Bros. Discovery og Paramount Skydance hefur verið mikið á milli tannanna á fólki, sérstaklega í Hollywood, undanfarna mánuði. Eftir uppboðsstríð við streymisveituna Netflix tókst Paramount að tryggja sér Warner Bros. á 111 milljarða Bandaríkjadala, jafnvirði um 13.800 milljarða íslenskra króna.
Stjórnendur Netflix vildu ekki jafna tilboðið og sögðu að ekki væri lengur fjárhagslega aðlaðandi að kaupa fyrirtækið á þessu verði. Með kaupunum kemst Paramount yfir yfirgripsmikið kvikmyndasafn, streymisveituna HBO og önnur fjölmiðlafyrirtæki í Warner Bros. Discovery.
Yfirvöld þurfa þó að samþykkja samrunann en ef af honum verður verða aðeins fjögur stór kvikmyndaver eftir í Bandaríkjunum. Andstaðan við samrunann hefur verið mikil og hafa rúmlega fimm þúsund manns í Hollywood skrifað undir opið bréf þar sem honum er mótmælt. Leikarar, framleiðendur, leikstjórar og aðrir hafa áhyggjur af færri tækifærum gangi samruninn í gegn, að störfum fækki, kostnaður hækki og að úrval fyrir neytendur verði minna.
Sigurjón Sighvatsson framleiðandi sem hefur unnið í Hollywood til áratuga segir að samruninn hafi verið óumflýjanlegur. Heimskviður kynntu sér samrunann, áhrif hans og sögu kvikmyndaveranna.
Yfirtakan kostar skildinginn
Baráttan um fjölmiðlarisann Warner Bros. Discovery hefur verið dramatísk, full af spennu og óvissu og er nánast að skrifast upp eins og klassísk Hollywood-ræma. Stjórnendur Warner tilkynntu á síðasta ári að fyrirtækið væri til sölu og núna virðist vera komin niðurstaða: Hluthafar Warner Bros. Discovery samþykktu tilboð Paramount Skydance á yfirtöku þess um miðjan apríl.
Sem fyrr segir kostar yfirtakan skildinginn og þarf Paramount að punga út hundrað og ellefu milljörðum Bandaríkjadala, tæplega fjórtán þúsund milljörðum íslenskra króna. Netflix neitaði að hækka sitt tilboð og dró það til baka.
Warner hafði í desember samþykkt yfirtökutilboð frá Netflix upp á 82 milljarða bandaríkjadala eða rúmlega ellefu þúsund milljarða íslenskra króna og hóf samrunaviðræður. Paramount uppfærði sitt yfirtökuboð en Warner hafnaði því tvisvar, síðast í upphafi árs. En í lok febrúar dró til tíðinda.
Netflix tilkynnti að það ætlaði að falla frá tilboði sínu eftir að Paramount hækkaði sitt. Og í apríl kom loksins niðurstaða í málið. Yfirvöld þurfa þó að samþykkja samrunann en áður en við höldum lengra skulum við aðeins skoða sögu þessara fjölmiðlarisa og þá sérstaklega kvikmyndaveranna, sem eiga sér langa sögu í Hollywood og eru yfir aldargömul.
Fyrsta kvikmyndin í fullri lengd með tali
Warner Bros. Pictures var stofnað 4. apríl 1923 af fjórum bræðrum, þeim Harry, Albert, Sam og Jack Warner. Það kom í stað fyrirtækis sem þeir höfðu átt áður, Warner Features Company sem var stofnað 1910. Með Warner Bros. Pictures vildu þeir einbeita sér eingöngu að kvikmyndaiðnaðinum.
Fyrirtækið gerði fyrstu kvikmynda í fullri lengd með bæði samstilltri upptöku, varasöng og tali, sem var reyndar aðeins á nokkrum stöðum í myndinni. Myndin hélt The Jazz Singer. Útgáfa hennar gjörbreytti kvikmyndaiðnaðinum og markaði endalok þögulla kvikmynda.
Jack Warner var sá bróðir sem var lengst við stjórn Warner Bros. Þegar fór að líða á efri ár seldi hann meirihluta sinn í fyrirtækinu og í gegnum áratugina hefur fyrirtækið gengið kaupum og sölum. Mikill uppgangur var hjá fyrirtækinu frá 1969. Þá sameinaðist það fjölmiðlafyrirtækinu Kinney National sem átti meðal annars DC Comics myndasöguframleiðandann.
Á þessum tíma framleiddi það kvikmyndir í samvinnu við stórstjörnur eins og Paul Newman, Robert Redford, Clint Eastwood og Barböru Streisand. Fyrirtækið átti mikilli velgengni að vegna og framleiddi stórmyndir á borð við A Clockwork Orange, The Exorcist og Mean Street ásamt því að gera myndir og sjónvarpsþætti í kringum myndasögupersónur eins og Superman, Batman, Wonder Woman og The Flash.
Frá 1990 var fyrirtækið hluti af Time Warner samsteypunni, þar sem rithöfundurinn Ólafur Jóhann Ólafsson var meðal annars aðstoðarforstjóri í tæplega áratug. Fjarskiptafyrirtækið AT&T keypti Time Warner og eftir erfið ár í heimsfaraldrinum losa það sig við WarnerMedia, sem var þá heiti fyrirtækisins.
Það sameinaðist Discovery Inc. 2022 og varð að Warner Bros. Discovery. David Zazlav er forstjóri þess. Í dag á Warner Bros. Discovery fjöldan allan af fjölmiðla- og kvikmyndafyrirtækjum og streymisveitum á borð við Discovery Channel, HBO og HBO Max, CNN, New Line Cinema og Cartoon Network, auk höfundarréttarins að Harry Potter. HBO hefur framleitt þekkta sjónvarpsþætti á borð við The Sopranos og Game of Thrones.
Með elstu kvikmyndaverum í heiminum sem enn er starfandi
Paramount er sjötta elsta kvikmyndaverið í heiminum, sem enn er starfandi. Það er eina hinna stóru kvikmyndavera í Bandaríkjunum sem enn hefur höfuðstöðvar í Hollywood í Los Angeles. Stóru kvikmyndaverin, eða Big Five studios, eins og þau eru gjarnan kölluð, ráða yfir um það bil 80 til 85 prósentum af tekjum af kvikmyndasölu í Bandaríkjunum.
Þetta eru fjölmiðlasamsteypurnar Universal, Paramount, Warner Bros., Disney og Sony. Fyrirtækin eru öll runnin undan rifjum kvikmyndavera sem voru starfandi á gullöld Hollywood, frá þriðja fram á sjöunda áratug síðustu aldar.
Paramount Pictures rekur uppruna sinn alla leið til 1912 þegar hinn ungverskættaði Adolph Zukor stofnaði Famous Players Film Company. Fyrirtækið hefur því verið starfandi í 114 ár. Paramount Pictures Corporation var síðan stofnað af leikhúsaeigandanum W.W. Hodkinson 1914. Það sameinaðist Famous Players og öðru kvikmyndafyrirtæki 1916 og til varð stærsta kvikmyndafyrirtæki þess tíma.
Paramount varð eitt af fyrstu kvikmyndaverunum í Hollywood til að gefa út mynd með hljóði. Fyrirtækið starfrækti bæði kvikmyndaver og kvikmyndahúsakeðju með rúmlega fimmtán hundruð kvikmyndahúsum um Bandaríkin til ársins 1948. Þá komst Hæstiréttur Bandaríkjanna að þeirri niðurstöðu að kvikmyndaver gætu ekki líka átt kvikmyndahúsakeðjur og fyrirtækinu var skipt upp í tvennt.
Án kvikmyndahúsakeðjunnar var reksturinn erfiður og næstu áratugi var tvísýnt hvort fyrirtækið hefði það að. Zukor var enn stjórnarformaður þess þegar komið var fram á sjönda áratug síðustu aldar en árið 1966 var fyrirtækið selt. Nánast óþekktur framleiðandi, Robert Evans, var ráðinn sem yfirframleiðandi og þrátt fyrir erfiða tíma hélt hann starfinu næstu átta árin og endurreisti orðspor Paramount með kvikmyndum eins og Rosemary's baby og The Godfather.
Kvikmyndaverinu hefur tekist í gegnum áratugina að framleiða mjög vinsæla kvikmyndabálka eins og Transformers, Mission: Impossible og Star Trek. Auk The Godfather framleiddi Paramount Pictures einnig stórmyndina Titanic, báðar myndir urðu tekjuhæstu kvikmyndir allra tíma þegar þær voru komu út. Auk þess heldur Paramount Skydance út streymisveitunni Paramount + og sjónvarpsstöðinni CBS. David Ellison keypti Paramount í fyrra og sameinaði það Skydance.
Erfitt að segja hver áhrifin verða en nokkrir hlutir sem koma til greina
Eins og ég nefndi í upphafi þarfnast samruninn samþykkis yfirvalda í Bandaríkjunum. Bæði dómsmálaráðuneytið og eftirlitsnefnd alríkisfjarskipta, FCC, þurfa að yfirfara tilboðið áður en fjölmiðlarisarnir tveir geta sameinast. Erfitt er að segja hver áhrif samrunans verða þar sem hann er ekki genginn í gegn en ýmsar breytingar gætu orðið. Breska ríkisútvarpið, BBC, tók saman nokkra punkta.
Í fyrsta lagi gæti kostnaður á streymisveitu sameinaðs fyrirtækis hækkað. Paramount er með veituna Paramount Plus og Warner með HBO Max. Vonir standa til að sameinuð veita geti staðið í samkeppnisaðilunum, Netflix, Amazon og Disney. Þá yrði líka meiri fjölbreytni fyrir áhorfendur, bæði gætu þeir horft á nýja þætti eins og The Pitt og klassískar bíómyndir eins og Casablanca, sjónvarpsþætti eins og Friends og The Sopranos.
Greinendur telja að í upphafi gætu núverandi áskrifendur að báðum streymisveitum fengið ódýrari áskrift að nýju streymisveitunni en að til lengri tíma litið gæti verðið hækkað þar sem minni samkeppni er á markaðnum.
Kvikmyndahúsa eigendur óttuðust yfirtöku Netflix á Warner Bros. Discovery og að það myndi þýða að myndirnar myndu ekki lengur fara í sýningu í kvikmyndahúsum. Ólíkt Netflix, reiða bæði Paramount og Warner Bros. sig enn á miðasölu til að auka ágóða af kvikmyndum sem þau framleiða.
Verði samruninn samþykktur á ein af stóru sjónvarpsstöðunum í Bandaríkjunum, CNN, eftir að falla undir stjórn Ellison-fjölskyldunnar. CNN er í eigu Warner Bros. Discovery í dag. Ellison-fjölskyldan á gott samband við Trump og Hvíta húsið og faðir David Ellison, milljarðamæringurinn Larry, er góðvinur Donalds Trumps Bandaríkjaforseta. Samruninn vakti því ótta hjá demókrötum og fjölmiðlafólki í Bandaríkjunum sem telja að umfjöllun um Bandaríkjastjórn eigi eftir að verða varkárri með samunanum.
Sá ótti er kannski er ekki alveg órökstuddur því að í samruna Paramount og Skydance eignaðist Ellison sjónvarpsstöðina CBS, sem síðustu mánuði hefur gengið í gegnum miklar breytingar. Ellison fór meðal annars í uppsagnir, sinnaðist við fréttamenn út af ritstjórnarlegum ákvörðunum og skipaði nýjan yfirritstjóra, hina umdeildu Bari Weiss. Hún hefur enga reynslu úr sjónvarpi en stofnaði fjölmiðilinn The Free Press sem aðrir bandarískir fjölmiðlar telja íhaldssaman.
Weiss neitaði til að mynda að sýna innslag fréttamannsins Sharyn Alfonsi í 60 mínútum í desember. Það fjallaði um reynslu fólks sem var sent í öryggisfangelsi í El Salvador eftir að bandarísk stjórnvöld vísuðu því úr landi. Breski fjölmiðillinn The Guardian hefur eftir starfsfólki CBS að það eigi von á miklum breytingum yfir sumarið og fyrir næstu þáttaröð. „Starfsfólk 60 mínútna er hrætt og bíður eftir stórkostlegum breytingum.“
Annar starfsmaður CBS sem kom ekki fram undir nafni sagðist hafa áhyggjur af því að Weiss myndi gera breytingar sem myndu skaða þáttinn. „Eins og hún hefur gert við allt annað hjá CBS News.“
Þriðji starfsmaðurinn varaði þó við því að stjórnendur vilji ekki gera of miklar breytingur og snúa þættinum á hvold. Óvissan er hins vegar mikil.
Yfir fimm þúsund manns skrifað undir bréf þar sem samrunanum er mótmælt
Andstaðan við samrunann hefur einnig aukist mikið síðustu vikurnar. Þegar þetta er skrifað hafa yfir fimm þúsund manns skrifað undir opið bréf þar sem samrunanum er mótmælt. Þetta eru leikarar, leikstjórar og fagfólk í kvikmyndaiðnaðinum. Í bréfinu er varað við afleiðingum hans.
„Afleiðingin af samrunanum verða færri tækifæri fyrir fólk til að skapa nýja hluti, færri störf í kvikmyndaframleiðslu, kostnaðurinn hækkar og áhorfendur í Bandaríkjunum og um allan heim, hafa minni valmöguleika. Það er einnig ógnvekjandi að þessi samruni myndi fækka stærstu kvikmyndaverum Bandaríkjanna niður í aðeins fjögur.“
Þeir sem hafa skrifað undir bréfið erum meðal annars stórleikarinn Robert DeNiro, leikstjórarnir Denis Villeneuve og JJ Abrams og leikarnarnir Emma Thompson og Mark Ruffalo.
Hann sagði í skoðanagrein í dagblaðinu New York Times í upphafi mánaðar að margar stjörnur í Hollywood værur hræddar við að skrifa undir bréfið af ótta við að vera settar á svartan lista hjá fjölmiðlarisunum og kvikmyndaframleiðslufyrirtækjum þeirra.
Demókratar á Bandaríkjaþingi krefjast þess einnig að dómsmálaráðherra Kaliforníu rannsaki samrunann gaumgæfilega. Paramount hefur brugðist við með því að lofa skuldbindingu við starfskrafta og tryggja að samningurinn muni skapa fleiri leiðir fyrir verkefni kvikmyndagerðarfólks, ekki færri.
Afstaðan til samrunans breyst mikið
Heimskviður settu sig í samband við Sigurjón Sighvatsson kvikmyndaframleiðanda sem hefur starfað í Hollywood í áratugi.
„Það náttúrulega hefur breyst mjög mikið afstaðan í þessum samrunapælingum. Menn vissu ekki endilega annað en að Warner Bros væru til sölu, enginn vissi hverjir myndu bjóða. Og svo kom Netflix fram og það var mikil óánægja með það í bransanum. Fyrst og fremst vegna þess að Netflix er efnisveita og framleiðir fyrst og fremst efni fyrir sína veitu. Þar af leiðandi í rauninni ólík uppbygging á þeirra efnisframleiðslu heldur en raunverulega Warner Bros. er með.“
Það hafi þótt sérstakt að Netflix hafi ákveðið að fara þessa leið en Sigurjón bendir á að Amazon, með streymisveituna Prime, hafi farið svipaða leið fyrir nokkrum árum. Þá keypti Amazon MGM, sem er varla lengur kvikmyndaver, en á efnismikinn katalóg, til að mynda James Bond.
Amazon er einmitt að fara af stað núna með framleiðslu nýjustu myndar um njósnara hennar hátignar og er þegar búið að auglýsa áheyrnarprufur fyrir Bond sjálfan. Sigurjón segir að þeir hafi staðið sig ágætlega í að framleiða kvikmyndir fyrir kvikmyndahús. Nýjasta dæmið um það sé kvikmyndin Project Hail Mary með Ryan Gosling í aðalhlutverki, sem sló í gegn fyrr á árinu.
„Í millitíðinni er Paramount til sölu og búið að vera langt söluferli þar sem þessi David Ellison, sem er sonur Larry Ellison sem á Oracle og er einn af efnuðustu mönnum heims, kaupir Paramount en fer strax að lýsa yfir áhuga á að kaupa Warner Bros líka. Þá skellir Netflix sínu tilboði á borðið og hann kemur hann fljótlega með móttilboð. Svo heldur þetta áfram.“
Uppboðsstríð fór í gang og hluthafar Warner Bros. hétu Netflix að borga gjald fyrir að yfirtökusamningurinn yrði ekki að honum, svokallað break up fee. Paramount greiddi það fyrir hönd Warner Bros., 2,8 milljarða Bandaríkjadala, sem er jafnvirði tæplega 400 hundruð milljarða íslenskra króna.
Sigurjón segir að það hafi þótt sérkennilegt og að getgátur hafi verið um að forstjóri Warner Bros. hafi talið að sínum hagsmunum væri betur borgið með Netflix. Tilboði Paramount var á endanum tekið enda miklar fjárhæðir undir og áhyggjuraddir fóru að heyrast.
„Þær auðvitað höfðu verið til staðar aðeins með Netflix, því fólk treystir nú Netflix ekki til að framleiða góðar bíómyndir. Það hefur allavega ekki sýnt sig að Netflix hafi gert mikið af því. Og þá er farið að mótmæla því að þetta muni hafa svo mikil áhrif á bransann.“
Verður CNN að Fox Light?
Sigurjón bendir á að um 150 þúsund manns vinni í kvikmyndaiðnaðinum í Los Angeles. Rúmlega fimm þúsund manns sem skrifuðu undir opið bréf þar sem samrunanum er mótmælt er því ekki stór hluti af bransanum, aðeins um þrjú prósent. Þeir sem styðji samrunan bendi á að Paramount sé ekki nógu stór til að keppa við hinar streymisveiturnar.
„Disney keypti 20th Century Fox fyrir nokkrum árum og er þannig búið að sameina þau tvö stúdíó. Þó að það sé langt á eftir Netflix með áskriftarfjölda þá eru þeir samt að komast upp í 175 milljón manns. Netflix er með rúmlega 300 milljón manns. Það voru ekki mikil mótmæli gegn því en núna er bransinn mikið hræddari. Það er bara vegna þess að það hefur svo margt breyst. Ekki síst gervigreindin komin til sögunnar, sem var ekki þá.“
Ekki minna atriði eru tengsl föður David Ellison, forstjóra Paramount Skydance, sem er Larry Ellison. Hann er einn stofnandi tæknifyrirtækisins Oracle og er mikill stuðningsmaður Donalds Trump Bandaríkjaforseta. Hann er íhaldssamur og er talinn hafa horn í síðu fjölmiðilsins CNN.
„Þeir sem hafa mestar áhyggjur af þessu eru kannski ekki síst þeir á pólitíska arminum, hvað mun Larry Ellison gera við CNN? Mun hann loka því, mun hann selja það eða mun hann gera það að annari Fox, Fox Light?“
Sigurjón finnst einnig athyglisvert hversu mikið fé Larry Ellison hefur lagt til fyrirtækis sonarins. „Hann er tilbúinn að leggja og lána í þetta allt að 40 milljarða dollara af eigin fé. Og ég held í allri sögu Hollywood hefur það aldrei gerst, að einstaklingur hafi lagt svo mikið undir.“
Þeir sem styðji samrunann eru einnig orðnir hræddir við stóru tæknifyrirtækin og að þau séu komin inn á markaðinn. Amazon er að framleiða fullt af efni, Apple TV er komið með eigin streymisveitu og stærsta sjónvarpsstöð í heimi, YouTube, er í eigu Google.
„Þannig að sko ég held að það sé ekki síst hræðslan við að tæknirisarnir séu að taka yfir Hollywood og hafa þeir einhvern áhuga á því að búa til áhugavert efni? Eða hafa þeir vit til þess og þekkingu? Auk þess sem að samrunar leiða oftast til uppsagna og færri starfa. Það eru mjög fáir samrunar sem maður þekkir til þar sem ekki hefur verið fækkað starfsfólki.“
Ekki hafi verið pláss fyrir alla þessa aðila á markaðnum. „Mín kenning hafði alltaf verið sú að þetta væri eitthvað sem myndi gerast, ekki síst í Bandaríkjunum. Vegna þess að kvikmyndahúsin þar, ég held þau séu 25 þúsund frekar en 30 þúsund, þau eru mikið byggð á árunum 1980 til 1995 og þau eru mjög mikið barn síns tíma.“
Þau séu staðsett í úthverfum en fólk sé að flytja aftur inn í borgirnar. Þau hafi verið byggð í verslunarmiðstöðum en þeim hafi mörgum verið lokað vegna aukinnar netverslunar.
„Þannig að ég hafði alltaf haldið að þessi blaðra myndi springa. Það er ekki pláss fyrir svona margar kvikmyndir og aðsóknin í þessi hús í Bandaríkjunum mun minnka vegna þess að þau eru of mörg, þau eru orðin gömul, það er ekki búið að endurnýja þau og þau eru mörg á röngum stöðum. Þannig að hvað það snertir þá held ég að þetta hafi verið óumflýjanlegt.“
Hlynntur samrunanum
Sigurjón segist vera hlynntur þessum samruna. Hann hafi verið með framleiðslufyrirtæki á svæði í eigu Paramount í Hollwyood.
„Ég man eftir því að ég var að gera Beverly Hills 90210 og ég var að gera Twin Peaks og við vorum með risavöruskemmur á leigu. Svo allt í einu hættum við að framleiða það og allt í einu vorum við með allt þetta svæði. Hvað eigum við að gera? Þið verðið að búa til efni, þið verðið að búa til efni til þess að borga leiguna á stúdíóunum. Það var eiginlega farið að snúast við. Alveg eins og með kvikmyndahúsin þá eru stúdíóin sjálf í raun kannski líka barn síns tíma.“
Fólk sé í ákveðinni afneitun því fækkunin sé til staðar, færri fari í bíó og fólk velji sér efni sjálft. Nýjir kjarasamningarnir og skattaívilnanir í öðrum ríkjum hafi einnig haft áhrif.
Paramount hefur reynt að friða áhyggjufulla með því að heita því að gefa út allavega 30 kvikmyndir á ári sem verði sýndar í kvikmyndahúsum. Sigurjón telur fyrirtækið verða að standa við það.
„Ég held að þeir verði að gera það ef þeir gera þetta, þá er þetta það kostnaðasamt, þessi kaup. Hafandi verið í samvinnu við Paramount þá veit maður að það sem þeir hafa framleitt í gegnum ári, og allt það efni sem þeir eiga er bara ekki nærri því að jafnmikið og það sem Warner Brothers á. Warner Bros. hefur þannig miklu sterkari sögu í því sem við köllum intellectual property. Það hefur verið notað mikið af því til þess að búa til þessar Marvel myndir og DC Comics-myndir. Þannig að ég held að til þess að geta farið í þannig framleiðslu þyrfti Paramount eitthvað meira og Warner Bros er með miklu dýpri katalóg.“
David Ellison, forstjóri Paramount Skydance hefur verið á milli tannanna á fólki. „Hann er 42 ára, búinn að vera meira en 20 ár eða meira í bransanum. Þó að hann hafi ekki framleitt endilega efni sem mér hugnast sérstaklega þá hefur hann framleitt fullt af efni og hefur fullt af reynslu og veit að hann þarf að framleiða efni sem fólk vill sjá. Að lokum skipta gæðin máli.“
Hann segir mikilvægt að þekkja iðnaðinn og vita hvernig hann virki. „Og það held ég hreinlega bara að Netflix viti ekki.“
Fyrst og fremst streymið sem hefur breytt bransanum
Sigurjón segir bransann hafa gjörbreyst síðan hann byrjaði. „Hann hefur náttúrulega gjörbreyst. Það er auðvitað, það er streymið fyrst og fremst sem hefur breytt því.“
Streymið hafi opnað möguleika fyrir minni þjóðir að framleiða efni sem hafi verið sýnt utan þeirra landsteina. Þess vegna sé orðin meiri fjölbreytni í framleiðslu á efni. Breytingarnar í Hollywood hafi verið að gerast hægt yfir langan tíma. Dýrar kvikmyndir eru orðnar dýrari, sem þýði að fleiri þurfi að koma í bíó til að þær borgi sig og hækka þyrfti miðaverð.
„Það eru náttúrulega líka bara kynslóðaskipti. Það eru heilar kynslóðir af þessum stærri, þekktari leikstjórum og það gat hefur í rauninni ekki verið fyllt. Fyrir utan að kynjajafnvægi hefur minnkað ef eitthvað er. Það bara hefur ekki verið nógu mikil fjölbreytni í myndum og ef það er ekki nógu mikil fjölbreytni þá kemur fólk ekki ef það er alltaf að horfa á það sama og sama. Þannig að það þarf líka endurnýjun líka.“
Hann telur Paramount geta staðið við skuldbindinguna um að gera 30 myndir á ári. „Ég held að þeir þurfi að gera það. Ég styð það að einstaklingur sem er allavega búinn að vera í bransanum, búinn að framleiða fullt þó það sé ekki endilega efni fyrir mig og hefur reynslu, hefur ágætis orðspor og hefur svo þar að auki fjölskyldupeninga sem hann er til í að setja í framleiðsluna eða fyrirtækið og það er náttúrulega bara mjög óeðlilegt.“
Með samrunanum eigi menningarleg áhrif Bandaríkjanna á heiminn eftir að minnka. Til langs tíma litið verði minna framleitt af kvikmyndum í Hollywood annað en stórmyndum.
Á meðan er að þróast iðnaður í hinum löndunum sem verður betri og betri. Tæknin er orðin betri og svo held ég þegar upp er staðið muni gervigreindin hjálpa þeim sem eru smærri. Þannig að þetta er kannski bara svolítið spennandi framtíð? Ég held að hún sé spennandi ef þetta er það fag sem þú vilt vera í en þú verður að ganga inn í það í dag á allt öðrum forsendum en ég gekk inn í það fyrir 40 árum.
