Icelandair hefur aflýst fimm flugferðum frá landinu í dag, þremur til Evrópu og tveim til Bandaríkjanna.
Ásdís Ýr Pétursdóttir, upplýsingafulltrúi Icelandair, segir við fréttastofu að flugum til Berlínar og Stokkhólms hafi verið aflýst vegna áhafnarskorts. Flugin áttu bæði að fara frá Keflavíkurflugvelli á áttunda tímanum í morgun.
Ásdís segir að flugum til Frankfurt, Portland og New York Newark hafi verið aflýst vegna flugvélaskorts, annars vegar vegna véla sem voru viðhaldsþurfi og hins vegar vegna seinkaðrar afhendingar á Airbus-vél.
Jón Þór Þorvaldsson, formaður Félags íslenskra atvinnuflugmanna (FÍA), segir við fréttastofu að áhafnarskorturinn sé ekki liður í verkfallsaðgerðum á þeirra vegum, hvorki formlegum né óformlegum.
Icelandair hefur ítrekað þurft að aflýsa flugum undanfarið vegna þess að ekki hefur tekist að manna flugin. Flugmenn og flugvirkjar standa þessa dagana í kjaraviðræðum við félagið.
FÍA og Icelandair funduðu hjá ríkissáttasemjara í gær. Fundurinn snerist, að því er Vísir greindi frá, um flugtíma, hvíld, vaktir og frí. Félögin munu funda aftur að morgni mánudags, annars í hvítasunnu.
