Reynir Traustason ritstjóri gagnrýnir harðlega bæði niðurstöðu héraðsdóms í plastbarkamálinu svokallaða og umfjöllun fjölmiðla um málið. Í ítarlegri færslu á Facebook segir hann dóminn fela í sér „mannorðsmorð“ á Tómasi Guðbjartssyni og telur að Ríkisútvarpið hafi farið offari í umfjöllun sinni.
Málið snýr að andláti Andemariam Beyene sem gekkst undir umdeilda plastbarkaaðgerð sem framkvæmd var af ítalska skurðlækninum Paolo Macchiarini við Karolinska-sjúkrahúsið í Svíþjóð. Héraðsdómur féllst nýverið á skaðabótakröfu fjölskyldu Andemariams gegn íslenska ríkinu vegna aðkomu íslenskra heilbrigðisyfirvalda og lækna að málinu.
Segir umfjöllunina hafa verið óvægna
Í Facebook-færslu sinni segir Reynir að umfjöllunin hafi verið óvægin gagnvart Tómasi og að læknirinn hafi verið dreginn fram í fjölmiðlum með ósanngjörnum hætti.
„Dómur undirréttar yfir íslenska ríkinu vegna plastbarkamálsins og andláts Andemariams Beyene og aðildar Tómasar Guðbjartssonar hjartalæknis felur í sér mannorðsmorð á lækninum,“ skrifar Reynir meðal annars.
Hann gagnrýnir sérstaklega þátttöku Sigurður G. Guðjónsson lögmanns í umræðunni og segir dylgjur um rasisma í tengslum við málið vera „hreina og viðbjóðslega aðför“.
„Gerði þau mistök að vera of trúgjarn“
Reynir telur að Tómas Guðbjartsson hafi fyrst og fremst verið of trúgjarn gagnvart Paolo Macchiarini og bendir á að Tómas hafi sjálfur viðurkennt þau mistök.
„Öllum ætti að vera ljóst að Tómas gerði þau mistök að trúa Paolo Macchiarini sem gerði aðgerðina á Andemariam og fleirum. Sjálfur hefur Tómas gengist við því að hafa verið of trúgjarn,“ skrifar Reynir og bætir við að óháð rannsóknarnefnd hafi áður fallist á þá skýringu.
Hann segir jafnframt að það sé engin sanngirni í því að gera Tómas ábyrgan fyrir dauða Andemariams.
Kallar eftir áfrýjun
Reynir segir að Tómas Guðbjartsson hafi lifað með málinu í rúman áratug undir miklu álagi og óvæginni fjölmiðlaumfjöllun.
„Allir sem þekkja til Tómasar og starfa hans vita að hann er góðmenni sem hefur unnið sín störf af kærleika og bjargað fjölmörgum mannslífum,“ skrifar hann.
Þá segir hann eðlilegt að ekkja Andemariams fái bætur vegna andlátsins, en hafnar því að íslenska ríkið eða Tómas eigi að bera ábyrgð á því sem gerðist.
Í lok færslunnar kallar Reynir eftir því að málinu verði áfrýjað og segir að dómurinn og rökstuðningur hans séu „hlaðin hroða“ og megi ekki standa óhögguð.
Málið hefur verið eitt umdeildasta heilbrigðis- og siðferðismál síðari ára hér á landi og hefur aðkoma íslenskra lækna að aðgerðunum verið til umræðu í rúman áratug.
