„Það lýsir að ég held svo vel þessari dýnamík á milli Ratcliffes og vopnfirskrar alþýðu sagan af því þegar einn góður drengur var hérna í sunnudagsfjallgöngu með fjölskyldunni og þau stoppuðu að fá sér nesti og dóttir hans var að berjast við að reyna að troða papparörinu ofan í kókómjólkurfernuna á meðan þau horfðu á Ratcliffe taka upp á þyrlunni inni í Ytri-Hlíð og fljúga nokkra kílómetra úteftir á skotsvæðið sitt. Ég held að þetta segi kannski alla söguna um hvernig þetta er í heiminum í dag: Þeir ríkustu þeir komast upp með allt saman en það er alþýðan sem þarf að borga brúsann,“ segir Bjartur Aðalbjörnsson, rúmlega 30 ára Vopnfirðingur og sveitarstjórnarmaður til átta ára. Hann ræðir þarna um stöðu Jims Ratcliffes í bænum og í sveitarfélaginu.
Jim Ratcliffe hefur eðlilega sett mark sitt á samfélagið í bænum og nærliggjandi sveitum á þeim 10 árum sem hann hefur stundað fjárfestingar í Vopnafirði. Fyrirtæki Ratcliffes, Six Rivers, eru leigutaki laxveiðiánna Selár og Hofsár og einnig landeigandi í Vopnafirði. Ratcliffe hefur auk þess tekið fleiri laxveiðiár á Norðausturlandi á leigu og vill enn þá fleiri, meðal annars Laxá í Aðaldal.
Hvaða áhrif hefur það á lítið samfélag eins og Vopnafjörð þegar slíkur maður, sem er í 153. sæti yfir ríkustu menn heims, hefur stundað fjárfestingar þar í áratug og hvernig verða íbúarnir varir við Ratcliffe?
Fjallað er um þetta og rætt við Bjart Aðalbjörnsson og formann Ungmennafélagsins Einherja á Vopnafirði, Rögnvald Þorgrímsson, um Jim Ratcliffe og áhrif hans í sveitarfélaginu í fréttaskýringaþættinum Þetta helst. Þáttinn má hlusta á hér:
Segir Ratcliffe yfirleitt vera skýjum ofar
Til að setja auðlegð Jim Ratcliffes í samhengi við fjárhagsstöðu sveitarfélagsins Vopnafjarðar þá voru tekjur þess rúmlega 1500 milljónir króna í fyrra og íbúarnir rúmlega 600.
Tekjur fjárfestingarfélags Jim Ratclifes, INEOS, eru á milli 80 og 90 milljarðar dollara á ári eða tæplega tíu til rúmlega ellefu þúsund milljarðar íslenskra króna. INEOS fjárfestir fyrst og fremst í hvers konar iðnaði, efna- og plastiðnaði og olíu- og gasvinnslu. Þekktasta fjárfesting Ratcliffes er hins vegar stór eignarhlutur í enska fótboltafélaginu Manchester United.
Bjartur segir að íbúar Vopnafjarðar verði yfirleitt lítið varir við Ratcliffe. „Það er náttúrlega þannig satt best að segja að við vitum rosalega lítið af sjálfum Jim Ratcliffe. Hann svífur bara skýjum ofar hérna og það er helst að maður heyri í þyrlunni þegar hún er að fara yfir þorpið. En fyrir alþýðu Vopnafjarðar þá hefur hann rosalega lítil áhrif á þeirra daglega líf.“
Styrkir Einherja með rútu
Bjartur ræðir um hvað Jim Ratcliffe hefur gert fyrir sveitarfélagið Vopnafjörð á þessum áratug. Hann segir meðal annar að ýmsir verktakar hafi fengið vinnu hjá fyrirtækjum Ratcliffes við húsbyggingar. Ratcliffe byggði sér meðal annars 1400 fermetra hús í Vesturárdal í Vopnafirði.
Svo kemur hann inn á það að fyrirtækið hafi keypt rútu fyrir Ungmennafélagið Einherja á Vopnafirði. Rútan verður notuð til að ferja íþróttalið Einherja í kappleiki. Rútan er 16 farþega ökutæki af gerðinni Ford. Þetta segir Rögnvaldur Þorgrímsson, formaður Einherja, við fréttastofu.
Bjartur Aðalbjörnsson segir að rútan sé líklega ein stærsta gjöf Ratcliffes til samfélagsins á Vopnafirði hingað til. Hann segir að honum finnst, þrátt fyrir þetta, að Ratcliffe hefði mátt leggja meira af mörkum til sveitarfélagsins Vopnafjarðar og íbúanna þar.
