Ragnar Þór Pétursson, kennari og fyrrverandi formaður Kennarasambands Íslands, gagnrýnir Viðskiptaráð fyrir framsetningu sína á árangri nemenda í mismunandi grunnskólum.
„Enn stekkur Viðskiptaráð af stað með eina af snilldargreiningum sínum á menntakerfinu,“ segir Ragnar Þór í færslu á samfélagsmiðlum.
Vísar hann meðal annars í töflu Viðskiptaráðs sem sýnir Smáraskóla á toppnum yfir þá sem luku framhaldsskóla þremur árum eftir grunnskólagöngu. Neðarlega á listanum er meðal annars Setbergsskóli.
„Á ég að segja ykkur hver er munurinn á Smáraskóla og Setbergsskóla? Þá þarf smá skýringu,“ segir Ragnar Þór. „Aðeins hluti nemenda útskrifast á nákvæmlega þremur árum. Það er líklegast í bekkjakerfi, ólíklegra í áfangakerfi og ólíklegast í iðnnámi. Hægt væri að búa til röð út frá námstíma og hún segði nákvæmlega ekkert um skólana annað en að nemendur fara (eðlilega) í alls konar nám eftir grunnskóla. Það skýrir hluta af þessu þrátt fyrir að Viðskiptaráð gangi út frá því að námsval í öllum hverfum sé eins (sem öll sem eitthvað vita sjá strax að er þvæla).“
En þegar Smárahverfið og Setbergshverfið séu ekki svo ólík hverfi. Hvernig megi það þá vera að annar slái öll met en hinn lúri við botninn? Ragnar Þór segir það ekki vera flókið.
„Árgangurinn sem um er að ræða var óvenjulítill í Smáraskóla (25 nemendur í stað 49 árið áður) og óvenjustór í Setbergsskóla (44 á móti 26 árið áður),“ segir hann. „Þar sem raunveruleikinn virkar þannig að algengt er að nemendur taki eina eða tvær aukaannir í framhaldsskóla voru hlutfallslega margir að útskrifast með litla hópnum í Smáraskóla og fáir með hópnum úr Setbergsskóla.“
Þá nefnir hann að til dæmis Víkurskóli og Álftamýraskóli hafi aldrei átt séns. Árgangarnir sem þar voru undir séu þeir einu í úrtakinu.
„Foreldrar í Setberginu þurfa ekki að setja húsin á sölu alveg strax,“ segir Ragnar Þór að lokum. „Ef þessi tafla er leiðrétt fyrir námsvali og misstórum árgöngum situr ekkert eftir. Og ekki í fyrsta sinn sem eitthvað svona hnoð er birt. Það eru nefnilega ekki bara börnin sem skortir talna- og lesskilning.“
