Áhöfnin á Bandero, skipi Paul Watson samtakanna, sem reyndi að hindra för hvalveiðiskips Hvals hf á fimmtudaginn er enn um borð í skipinu.
Skúli Jónsson, yfirlögregluþjónn á höfuðborgarsvæðinu, segir að tveir lögregluþjónar gæti skipsins, sem liggur við bryggju á lokuðu svæði í Sundahöfn. Hann segir að ekkert bendi til þess að það væsi um fólkið.
Pizzur og nóg af vatni
„Vatn er um borð í tönkum og ef það vantar vatn, þá er því bætt á þarna í höfninni,“ segir Skúli.
Hafa þau fengið aðstoð frá einhverjum? „Það hafa komið þarna fulltrúar frá sendiráðum, meðal annars. Þau pöntuðu sér mat, það komu pizzur þarna í gær. Þannig að þau eru einhvernveginn að bjarga sér, eins og maður segir.“
Gætu þurft að vera um borð í fjórar vikur
Hvað gæti fólkið verið lengi í þessari stöðu? „Maður vonar að það verði ekkert lengi. Það er ekkert gott að vera í þessari stöðu, en þessi ákvörðun um að þau haldi sig um borð í skipinu er á grundvelli útlendingalaga og sá tími var markaður í fjórar vikur. En ég vona að það verði ekki svoleiðis.“
Farið var fram á ýmist endurkomubann eða brottvísun - eftir því frá hvaða löndum fólkið kemur, en alls er 21 í áhöfninni. Útlendingastofnun tekur afstöðu til þess og eftir það hafa skipverjarnir þriggja daga andmælarétt.
Haldlögðu samskiptatæki og sjóferðabók
Áhöfnin á Bandero hefur gagnrýnt að þau hafi ekki fengið lista yfir þá muni sína sem voru haldlagðir. „Það voru haldlagðir munir þarna; tölvur, sjóferðabók, siglingatölvan, minnisblöð, kort úr Go-Pro myndavélum og drónum og símar. Svo er þetta skráð, sá listi liggur fyrir núna og það er bara að afhenda hann,“ segir Skúli.
Verður það gert í dag? „Nei, ég reikna ekki með því, það hafði ekkert verið komið að máli við okkur að afhenda þennan lista. Maður sér þetta bara í fjölmiðlum.“
En ef bæði tölvur og símar fólksins voru haldlögð, er verið að reyna að koma í veg fyrir að þau hafi samband við annað fólk? „Nei, það er ekkert svoleiðis, við erum bara að reyna að varpa ljósi á hvað gerðist þarna úti á sjó.“
Fengu heimild til haldlagningar
Skúli segist ekki hafa upplýsingar um hvort byrjað sé að skoða gögnin. Shannon Mann, einn skipverja á Bandero hefur sagt að lögregla hafi ekki haft heimild til að haldleggja og leita í munum áhafnarinnar. Skúli segir að slík heimild hafi verið fyrir hendi.
„Síðdegis á föstudaginn þegar lögreglan á höfuðborgarsvæðinu fékk málið til sín, var leitað eftir úrskurði dómara um að fá að leita í skipinu og haldleggja muni í þágu rannsóknar, Sá úrskurður fékkst á föstudagskvöldið og á grundvelli þess var þessi leit gerð og þessir munir haldlagðir.“
