Jón Pétur Zimsen, þingmaður Sjálfstæðisflokksins, er heldur betur kominn í stand fyrir sumarið. Þingmaðurinn og skólastjórinn fyrrverandi hefur verið í heilsuátaki síðustu vikurnar og hefur árangurinn ekki látið á sér standa.
Hann hefur leyft fylgjendum sínum á Facebook að fylgjast með gangi mála og í gær birti hann lokatölur, ef svo má segja.
Jón Pétur tók hressilega til í mataræðinu og hreyfingu en þegar átakið hófst var hann 117,3 kíló. Markmiðið var að styrkjast og komast niður fyrir 100 kíló og tókst það á dögunum. Átakið tók alls 91 dag og léttist hann um rétt rúm 18 kíló, fór úr 117,3 kílóum í 99,2 kíló.
„Ég bjó að því að hafa eiginlega alltaf verið í mjög góðu formi. Á þessum 91 degi fór ég á einhverskonar æfingu ca 80 sinnum. Sumar voru bara ganga í halla en aðrar erfiðar lyftingaæfingar og allt þar á milli,“ segir Jón Pétur í færslu á Facebook.
„Ég borðaði svo gott sem ekkert brauð og engin sætindi. Drakk engar hitaeiningar en mokaði í mig harðfiski, bláberjum, kasjúhnetum, ávöxtum, ab mjólk, fiski/kjöti, grænmeti ofl.,” segir þingmaðurinn sem kveðst hafa styrkt sig verulega á þessum þremur mánuðum.
„Er mun betri og líkamlega og geðið kemur líka með,” segir hann en færsluna og myndir frá vegferðinni má sjá hér að neðan.
