Íslendingar og ferðamenn hér á landi hafa lent í vandræðum með að ná sambandi við 112 eftir að slökkt var á 2G og 3G sendum. Vandræðin hafa snúið að því að sumir farsímar leiti á 2G eða 3G kerfin þegar reynt er að hringja neyðarsímtal og ná þar af leiðandi ekki í gegn. Farsímar hafa virkað í allar aðrar aðgerðir, hvort sem það er að vafra um netið eða hringja í önnur sjö stafa símanúmer. Af þeim sökum hefur Neyðarlínan og Fjarskiptastofa ákveðið að bæta við númerinu 599-0112.
Í fréttatilkynningu frá Fjarskiptastofu er vakin athygli á því að: „ símtöl í þetta númer eru meðhöndluð sem almenn símtöl. Þau njóta ekki sama forgangs og símtöl í 112 og senda ekki sjálfkrafa staðsetningarupplýsingar til neyðarþjónustu. Í neyðartilfellum skal þó alltaf hringja fyrst í 112. Varanúmerið er aðeins ætlað til notkunar þegar ekki næst samband við 112 eða samskipti eru ómöguleg vegna slæmra tenginga.“
Í sömu tilkynningu segir einnig að Fjarskiptastofa, Neyðarlínan og íslensk farsímafyrirtæki vinni sameiginlega að því að greina orsakir vandræðanna og finna lausnir eins fljótt og auðið er.
Vilja ekki kannast við fullyrðingar Símans
Lokun 2G og 3G fjarskiptakerfanna er ekki óumdeild. Farnetsþjónusta er ekki skilgreind í lögum sem neyðar- og öryggisfjarskiptaþjónusta. Í svari innviðaráðuneytisins til fréttastofu segir að „slík þjónusta [sé] veitt á markaðslegum forsendum“.
Fjarskiptafélögin hafa sagt að Fjarskiptastofu og ríkinu hafi staðið til boða að taka við rekstri eldri kerfanna til þess að tryggja áframhaldandi örugga fjarnetsþjónustu og grípa inn í lokunina á hvaða tímapunkti sem er en Fjarskiptastofa segir að svo sé ekki.
Í viðtali við fréttastofu 30.júní sagði Logi Karlsson, framkvæmdastjóri tækniþróunar hjá Símanum: „Ríkið getur haft allt um allt að segja ef áhugi er fyrir hendi. Þetta er búið að vera samtal við Fjarskiptastofu sem er stjórnvald. Þau eru vel upplýst og hafa verið í mörg ár. En ef ríkið hefði viljað grípa inn í hefðu verið öll tækifæri til þess.“
Fréttastofa hefur falast eftir viðtali við Fjarskiptastofu allar götur síðan en þeir hafa beðist undan því. Þeir hafa þó svarað skriflega. Í svari Fjarskiptastofu til fréttastofu um þetta segir:
„Varðandi þá fullyrðingu Símans að ríkinu hafi staðið til boða að taka yfir rekstur 2G- og 3G-kerfa þá er það ekki í samræmi við þann skilning sem við höfum á málinu.
Eftir því sem best er vitað kom þessi hugmynd einungis fram í óformlegri umræðu á fyrstu stigum verkefnisins. Hún varð hvorki að formlegri tillögu né erindi til stjórnvalda eða Fjarskiptastofu og því var ekki tekin afstaða til hennar sem slíkrar. Þetta er í samræmi við það sem fram kemur í samskiptum við ráðuneytið, þar sem bent er á að ekki sé kunnugt um neitt tilboð eða formlegt erindi um að ríkið tæki yfir rekstur kerfanna.“
Innviðaráðherra óskar eftir samantekt
Fjarskiptastofa segir enn fremur í svari sínu til fréttastofu að í lögum sé ekki gert ráð fyrir því að Fjarskiptastofa þurfi að samþykkja lokun almennra farnetskerfa eða geti gripið inn í og bannað slíka lokun.
Fréttastofa leitaði eftir viðtali við innviðaráðherra, Eyjólf Ármannsson, um þessi málefni. Innviðaráðuneytið fer með fjarskiptamál ríkisins. Eyjólfur gaf ekki kost á viðtali en fréttastofu barst skriflegt svar þar sem segir að hann muni óska eftir samantekt frá Fjarskiptastofu um breytingar til að tryggja að útfösunin hafi gengið vel og hafi haft sem allra minnst áhrif eins og stefnt var að í upphafi.
Ekki bara neyðarsímtölin
Ísland var fyrsta Evrópuþjóðin til þess að ljúka útfösun á kerfunum. Augljós vandræði hafa verið með neyðarsímtölin en einnig hafa fréttastofu borist ábendingar um verra símasamband víða á landsbyggðinni. Þá hafa bændur og aðrir í landbúnaði kvartað yfir því að róbótar á þeirra vegum nái ekki sambandi jafn vel og áður. Sumir bændur hafa brugðið á það ráð að setja upp StarLink kerfi á bæjum sínum.
Í samtali við fréttastofu hafa einnig öryggisfyrirtæki, lyftufyrirtæki og aðrir sem reiða sig á símkort í sinni þjónustu þurft að uppfæra búnað, sem hefur kostað sitt.
Í svari Fjarskiptastofu til fréttastofu segir að í sumar eða haust verði farið í mælingar um land allt þar sem samband verður mælt og tekið út. Borið verður saman við fyrri mælingar og þá ættu þeir að fá betri mynd af því hvernig útfösun 2G og 3G hefur tekist til með tilliti til símasambands á landinu. Þeir hvetja fólk einnig til þess að hafa samband við þá ef það verður vart við svæði þar sem áður var samband en er ekki nú. Hægt er að gera það með því að smella hér
