Steinunn Lóa Hafþórsdóttir var nýorðin þrítug þegar hún lést við fæðingu sonar síns á Landspítalanum 19. maí síðastliðinn. Fjölskylda hennar, Hjalti Einarsson og stjúpdóttirin Amalía Erla, sitja eftir í sárum og nýfæddur sonur þeirra dvelur enn á vökudeild spítalans vegna súrefnisskorts í fæðingu.

Vinkonur Steinunnar hafa blásið til söfnunar fyrir fjölskylduna og deila frásögninni á Facebook.

Frá árinu 1981 hafa fimm konur látist vegna „fylgikvilla þungunar, barnsburðar og sængurlegu,“ samkvæmt tölum Hagstofunar. Þar af varð eitt andlát 2022, annað 2011 og það þriðja 2001. Kona lést árið 1990 og önnur árið 1987 af sömu orsökum.

„Það er ólýsanlega sárt að þurfa að kveðja svona einstaka, fallega og kærleiksríka manneskju alltof snemma,“ segir í færslu vinkvenna hennar, sem sjá má hér fyrir neðan.

„Steinunn snerti líf svo margra með hlýju sinni, fallega brosinu og þeirri einstöku nærveru sem fylgdi henni hvert sem hún fór. Orðin duga varla til að lýsa missinum sem við finnum öll fyrir.“

Þær segja að fjölskyldan muni standa frammi fyrir miklum áskorunum og erfiðleikum í lífinu vegna þessa ólýsanlega áfalls.

„Við vinkonur Steinunnar Lóu höfum ákveðið að setja af stað söfnun fyrir fjölskyldu hennar til að létta undir á þessum erfiða tíma, svo þau geti einbeitt sér að því sem skiptir mestu máli núna - að syrgja, standa saman og vera hjá litla drengnum sínum,“ segja þær.

„Framundan er langur og erfiður vegur, bæði andlega, tilfinningalega og fjárhagslega, og því viljum við leggja okkar af mörkum til að styðja þau í gegnum þennan tíma.“

Útför Steinunnar fer fram í næstu viku frá Hafnarfjarðarkirkju.