„Það er ekki síst Marentzu Poulsen að þakka að líf færðist yfir Grasagarðinn í Reykjavík þegar hún opnaði þar Kaffi Flóru um aldamótin. Síðar lifnaði einnig yfir Kjarvalsstöðum þegar Marentza tók við kaffihúsinu þar,“ segir Albert Eiríksson.
Marentza Poulsen er Íslendingum löngum kunn fyrir störf sín í veitingageiranum. Hún hefur oft verið kölluð smurbrauðsdrottning Íslands og er þekktust fyrir að innleiða danskar matarhefðir, á borð við jólahlaðborð og smurbrauð, í matarmenningu landsins.
Alin upp hjá matarelskandi foreldrum
Hún er fædd og uppalin í bænum Skopun á Sandey í Færeyjum hjá matarelskandi foreldrum og fluttist á unglingsaldri með fjölskyldu sinni til Íslands. Þar hóf Marentza sinn starfsferil innan veitingageirans, fyrst á Hótel Sögu og síðar á Hótel Loftleiðum.
Þegar hún var 18 ára gömul fór hún til Kaupmannahafnar og lærði hjá Idu Davidsen og þar varð smurbrauðsjómfrúin til. Marentza hefur því sterkar taugar til danskrar matarhefðar auk áhrifa frá móður sem kunni að nýta og gera dýrindis máltíðir úr því sem til féll á eyjunni.
„Margt hef ég lært af Marentzu í gegnum árin en leiðir okkar lágu fyrst saman við opnun Café Nielsen á Egilsstöðum fyrir tuttugu og fimm árum. Einhverra hluta vegna gekk mér illa að muna nafnið hennar en þá sagði hún glaðlega: Hugsaðu bara um marengstertu, þá geturðu ekki gleymt nafninu!“
Hér er guðdómlega góð hvít kókosterta eftir hana sem finna má á heimasíðu Alberts.
Marentza Poulsen gerir himneska kókostertu
Hvít kókosterta
- 3 bollar hveiti
- 1 msk. lyftiduft
- 3/4 tsk. salt
- 3/4 bolli smjör, mjúkt
- 1 3/4 bolli sykur
- 4 stór egg, aðskilin
- 1 tsk. vanilludropar eða vanilluextrakt
- 1 tsk. kókosdropar eða kókosextrakt
- tæplega 1 dós ósæt kókosmjólk (400 ml) – afgangurinn fer í kremið
- 1/4 tsk. vínsteinsduft (cream of tartar)
Krem
- 170 g rjómaostur, mjúkur
- 1/4 bolli smjör, mjúkt
- 4 bollar flórsykur
- nokkrar msk. ósæt kókosmjólk
Til skrauts
- 200 g gróft sætt kókosmjöl
- ferskar fjólur eða önnur falleg blóm
Aðferð
Botnarnir
- Sigtið saman hveiti, lyftiduft og salt í stóra skál. Hrærið smjör og sykur þar til blandan er létt og ljós. Bætið eggjarauðunum út í, einni í einu, og hrærið vel á milli. Bætið vanillu- og kókosdropum saman við.
- Setjið þurrefnin og kókosmjólkina út í til skiptis og hrærið þar til deigið er slétt.
- Þeytið eggjahvíturnar í sérskál þar til þær fara að stífna. Bætið vínsteinsdufti út í, ef það er notað, og þeytið þar til hvíturnar eru stífar. Blandið um þriðjungi af eggjahvítunum varlega út í deigið og fellið síðan afganginn varlega saman við.
- Skiptið deiginu í tvö 23 cm kökuform sem hafa verið klædd með bökunarpappír. Bakið við 180 °C í 30–40 mínútur. Látið botnana kólna í formunum.
Kremið
- Hrærið smjör og rjómaost vel saman. Sigtið flórsykurinn út í og blandið vel. Bætið kókosmjólk út í, einni matskeið í senn, þar til kremið er passlega mjúkt.
Samsetning
- Setjið annan botninn á kökudisk og smyrjið um 3/4 bolla af kreminu ofan á hann. Dreifið um 1/2 bolla af kókosmjöli yfir kremið. Leggið hinn botninn ofan á.
- Smyrjið afganginum af kreminu ofan á og á hliðarnar. Þrýstið restinni af kókosmjölinu ofan á og utan á kökuna.
- Gott er að setja tertuna saman deginum áður og geyma hana í ísskáp. Takið hana út um tveimur klukkustundum áður en hún er borin fram. Skreytið með fjólum eða öðrum fallegum blómum.
