Samtökin Geðhjálp lýsa vonbrigðum með ákvörðun Reykjavíkurborgar að leggja niður Mannréttindaskrifstofu og mannréttindaráð og segja ákvörðunina hluta af þróun þar sem málefni jaðarsettra hópar séu sett til hliðar. Þau segja mannréttindi ekki fitulag sem auðvelt sé að skera burtu, eins og stjórnmálamenn hafi haldið fram.
Þetta kemur fram í yfirlýsingu frá stjórn Geðhjálpar. Þar er vitnað í orð borgarstjóra úr kosningabaráttunni fyrir sveitarstjórnarkosningar um Mannréttindaskrifstofuna, þar sem hún sagði að Reykjavík væri eina sveitarfélagið sem reki slíka skrifstofu, og að hún vissi ekki til þess að mannréttindi væru fótum troðin í öðrum sveitarfélögum.
Í yfirlýsingu Geðhjálpar segir að þekking á mannréttindum sé oft takmörkuð, eins og orð borgarstjóra sýni. Mannréttindi séu brotin á hverjum degi í búsetuúrræðum borgarinnar. Þá segja samtökin rétt að minna á að Reykjavíkurborg sé höfuðborg Íslands og því eigi að gera ríkari kröfur til hennar en minni sveitarfélaga.
Geðhjálp setur lokun skrifstofunnar einnig í samhengi við bakslag í réttindabaráttu minnihlutahópa.
„Nýjustu dæmi þess eru andstaðan við Kaffistofu Samhjálpar og opnun fyrirhugaðs skjólshúss. Fordómar verða ekki til í tómarúmi heldur spretta upp úr jarðvegi þar sem áherslan er á aðra hluti en mannréttindi og umburðarlyndi.“
