Veðurfræðingur segir hita hækka meira á meginlandi Evrópu en annars staðar. Einfaldasta leiðin til að snúa við spám sérfræðinga sé að draga úr losun gróðurhúsalofttegunda.
Alþjóðaheilbrigðisstofnunin telur að minnst 1.300 manns hafi farist í hitabylgjunni sem hófst fyrir rúmri viku. Stofnunin varar við því að þessi hiti sé aðeins forsmekkur þess sem koma skal.
Að minnsta kosti 35 stiga hiti verður hjá um 95 milljónum Evrópubúa í dag, einkum í austur- og suðurhluta álfunnar. Hitamet féll í Slóvakíu í gær þegar hiti mældist þar 41 stig; og í Tékklandi á sunnudag þegar hiti fór í 41,9 stig.
Útilokar ekki aðra hitabylgju seinna í sumar
Lofthiti hækkar meira á meginlandi Evrópu en annars staðar, segir Halldór Björnsson, fagstjóri veðurs og loftslags hjá Veðurstofu Íslands. Hann segir mesta hita hvers árs einnig hækka enn hraðar í Evrópu. Fjöldi hitameta hefur fallið í álfunni að undanförnu og hiti hefur víða farið yfir 40 gráður. Halldór segir mikið vera eftir af sumrinu.
„Það eru tveir mánuðir eftir af sumrinu í Evrópu og það eru tveir heitustu mánuðirnir,“ segir Halldór.
„Yfirleitt eru mestu hitabylgjurnar í júlí eða í ágúst. Það er júníhitabylgja og þessi hitabylgja hefði verið vond í hvaða mánuði sem er en það er ekkert sem segir að við getum ekki fengið aðra hitabylgju í Evrópu í sumar.“
Halldór segir spár sérfræðinga um stigmagnandi hita á heimsvísu hafa gengið eftir fram að þessu. Til þess hægja á hnattrænni hlýnun sé sérstaklega mikilvægt að minnka losun gróðurhúsalofttegunda. Í því skyni þurfi að huga að orkuskiptum og að skipta jarðefnaeldsneyti út fyrir aðra orku.
„Fyrir Íslendinga er það líka og við getum þetta mjög auðveldlega því við höfum mjög mikið af hreinni orku. En við þurfum líka að huga að losun frá landi og slíku og þá er það sérstaklega endurheimt votlendis og skógrækt sem við getum auk þess gert.“
Hægt er að hlusta á viðtalið við Halldór í Morgunútvarpinu í spilaranum hér að neðan.
