Dómsmálaráðherra segir viðbrögð stjórnvalda og viðbúnað Landhelgisgæslunnar vegna skipsins Bandero ekki snúast um hvalveiðar eða afstöðu til þeirra heldur um öryggi sjófarenda. Ráðherra lagði fram minnisblað á ríkisstjórnarfundi í morgun um viðbrögð Landhelgisgæslunnar vegna komu skipsins.
„Alveg skýrt að hvalveiðar eru löglegar“
„Við vitum öll hverjar yfirlýsingarnar hafa verið. Fyrir mér er þetta ekki mál sem snýst um hvalveiðar eða afstöðu til hvalveiða,“ segir Þorbjörg Sigríður Gunnlaugsdóttir, dómsmálaráðherra.
„Þetta er mál sem snýst um öryggi sjómanna sem eru hér á veiðum og auðvitað líka áhöfn hins erlenda skips. Þannig við fylgjumst með.“
Þorbjörg lagði fram minnisblað á ríkisstjórnarfundi í morgun um viðbrögð Landhelgisgæslunnar við komu skipsins Bandero, sem er í eigu aðgerðarsinnans og hvalveiðiandsstæðingsins Paul Watson.
„En það er alveg skýrt að hvalveiðar eru löglegar samkvæmt íslenskum lögum, hvað sem mönnum kann að finnast um það.“
Markmið stjórnvalda og hlutverk Landhelgisgæslunnar sé að tryggja öryggi sjófarenda.
„Og munum grípa til allra þeirra aðgerða sem við þurfum að gera til að ná því markmiði ef á reynir.“
Hvað áttu með því?
„Það er algjörlega skýrt að við förum í þær aðgerðir sem á þarf að halda. Það eru nokkrar sviðsmyndir uppi í þeim efnum. Auðvitað erum við alltaf með hugann við meðalhóf. En íslensk stjórnvöld láta það auðvitað ekki líðast að hingað til lands komi menn í þeim tilgangi, með yfirlýsingar um það að ógna öryggi sjófarenda. Reyni á það, þá verður gripið til aðgerða.“
Hóta að gera atlögu að olíufélagi
Paul Watson-samtökin birtu færslu á samfélagsmiðlum rétt fyrir miðnætti í gær, þar sem tilkynnt var að þau hyggist gera atlögu að Olíudreifingu, olíufélagið sem Hvalur skiptir við.
Árni Gunnarsson, framkvæmdastjóri Olíudreifingar, segir að engar hótanir um mögulegar aðgerðir hafi borist. Þeir fylgist þó með umræðunni og séu meðvitaðir um stöðuna.
Búið sé að ræða við bílstjóra og brýnt fyrir þeim að vera á varðbergi þar sem hótanirnar gætu mögulega haft áhrif á þeirra störf.
Á siglingu vestur af Snæfellsnesi
Slökkt er á staðsetningartæki Bandero og því hefur verið óljóst hvar skipið heldur sig. Að kröfu Landhelgisgæslunnar sendir áhöfnin staðsetningu á klukkustundar fresti.
Samkvæmt heimildum fréttastofu er skipið á siglingu vestur af Snæfellsnesi. Það hefur ekki komist í nálægð við hvalveiðiskipin Hval 8 og 9.
Gefur lítið fyrir þetta „anti-everything lið“
Kristján Loftsson, forstjóri Hvals hf., hefur ekki svarað beiðni fréttastofu um viðtal. Hann segir í samtali við Morgunblaðið gefa lítið fyrir „þetta anti-everything lið“ eins og hann kallar liðsmenn Paul Watson-samtakanna – sem mætti útleggja sem fólk sem er á móti öllu.
Kristján segist ekki hafa trú á að íslensk systursamtök Paul Watson-samtakanna, sem hafa gagnrýnt aðgerðirnar, séu þeim mótfallin. Síðustu daga hafi fólk verið fyrir utan hvalstöðina í Hvalfirði, fylgst með starfseminni og ferðum hvalveiðibátanna og tilkynni það sem fyrir augum ber til liðsmanna Paul Watson-samtakanna. Dýraverndarsamband Íslands og Hvalavinir eru meðal samtaka sem hafa opinberlega gagnrýnt aðgerðir áhafnarinnar á Bandero.
100 ára afmælisfögnuði gæslunnar aflýst
Leiðangur Bandero hefur einnig orðið til þess að búið er að aflýsa fyrirhuguðum hátíðarhöldum í Vestmannaeyjum á morgun, í tilefni af 100 ára afmæli Landhelgisgæslunnar. Ásgeir Erlendsson, upplýsingafulltrúi gæslunnar, segir að ljóst hafi orðið að afmælinu yrði aflýst – enda gangi verkefnin fyrir.
