Bandarísk kona á dauðadeild fangelsis í Tennessee lifði af tvær aftökutilraunir í gærkvöld. Christa Pike var dæmd til dauða fyrir manndráp fyrir um 30 árum, þegar hún var 18 ára. Hún varð þar með ein yngsta konan sem dæmd hefur verið til dauða í bandarískri réttarsögu.
Umfjöllun um Pike hefur verið áberandi hjá erlendum fjölmiðlum síðustu daga.
Pike hlaut dóminn fyrir manndráp sem hún framdi ásamt kærasta sínum í Knoxville í Tennessee árið 1995. Kærasti hennar var 17 ára og fékk því vægari dóm – lífstíðardóm með möguleika á skilorði.
Þau voru sakfelld fyrir að bana hinni 19 ára Colleen Slemmer.
Þriðji sakborningurinn í málinu var Shadolla Peterson, þá 18 ára, sem fékk skilorðsbundinn dóm því hún var samvinnuþýð í rannsókn yfirvalda.
Pike sagði lögreglunni á sínum tíma að hún hefði verið afbrýðisöm því, að hennar sögn, að Slemmer hefði reynt að fanga athygli kærasta Pike. Parið beitti Slemmer grimmilegu ofbeldi og málið vakti mikinn óhug á sínum tíma.
Pike hefur aldrei neitað því að hafa orðið Slemmer að bana.
Málið hefur vakið mikla umræðu allar götur síðan. Pike hefur breyst nokkuð síðustu ár og spurningar hafa vaknað um hvort svo ungt fólk eigi að fá þyngsta mögulega dóm.
Skiptar skoðanir um dauðadóminn
Aðgerðasinnar hafa síðustu misseri barist fyrir því að fá dauðarefsingu Pike mildaða í lífstíðardóm, meðal annars með þeim rökum að mögulega færi aftakan úrskeiðis.
Þeir hafa einnig fært rök fyrir nýrri málsmeðferð á grundvelli þess að geðraskanir sem hún þjáist af og áfallastreita vegna ofbeldis sem hún var sjálf beitt í æsku gætu hafa haft áhrif á gjörðir hennar.
Móðir Slemmer hefur hins vegar lagst alfarið gegn því. Á mánudag varð ljóst að Pike yrði tekin af lífi – þegar ríkisstjóri Tennesse neitaði að beita sér fyrir breytingu dómsins.
Því stóð til að Pike, sem er nú fimmtíu ára, yrði tekin af lífi í gær. Eftir tvær árangurslausar tilraunir var Pike flutt á sjúkrahús, þar sem hún er enn samkvæmt umfjöllun fjölmiðla vestanhafs.
Ekki er ljóst hvers vegna aftakan misheppnaðist eða hver næstu skref verða. Þá liggja ekki heldur fyrir upplýsingar um líðan Pikes. Hún fékk tvo skammta af fenóbarbitóli og fá dæmi, ef nokkur, eru um að einhver hafi lifað það af.
Það getur gerst að böðlar finni ekki æðar fanga eða að áhrif lyfsins séu meiri og verri en gert er ráð fyrir en það er nær óþekkt að einhver lifi af.
Fréttamenn sem hafa oft verið viðstaddir aftöku segjast aldrei hafa séð annað eins.
Pike hefði verið fyrsta konan sem yfirvöld í ríkinu taka af lífi í yfir 200 ár og sú átjánda í Bandaríkjunum síðustu fimm áratugi. Þetta er hins vegar í annað sinn á þessu ári sem aftaka misheppnast í Tennessee.
Fangelsismálayfirvöld í Tennessee segja að farið hafi verið eftir öllum reglum.
Öllum aftökum sem áttu að fara fram til áramóta hefur verið frestað og Bill Lee, ríkisstjóri Tennessee, heitir óháðri rannsókn. Hann þvertekur þó fyrir að náða Pike.
Eina von hennar og lögfræðinga hennar er að geta beitt áttunda viðauka stjórnarskrár Bandaríkjanna, sem kveður á um að refsingar skuli ekki vera miskunnarlausar og grimmar.
