Meiri hluti atvinnuveganefndar hefur lagt til að afnám skel- og rækjubóta og línuívilnunar verði fellt brott úr frumvarpi um breytingu á lögum um stjórn fiskveiða. Flutningsmaður frumvarpsins er Eyjólfur Ármannsson innviðaráðherra.
Lilja Rafney Magnúsdóttir, formaður atvinnuveganefndar og þingmaður Flokks fólksins, segir það gert vegna þess að samstaða hafi ekki náðst um málið með stjórnarandstöðu. Enn standi til að ráðast í heildræna endurskoðun á skel- og rækjubótum, línuívilnun og byggðakvótakerfinu en frumvarp þess efnis er væntanlegt í haust.
Lilja Rafney fagnar því að samstaða hafi náðst um að fá 2.700 tonna viðbótina við strandveiðiheimildir í sumar. „Það lítur út fyrir að þetta verði mesta magn sem verið hefur í gegnum árin til strandveiða í sumar,“ segir hún í samtali við fréttastofu.
„Rækju- og skelbætur eru orðnar barn síns tíma“
Lilja segir búið að tryggja sumarvertíð strandveiða í sumar en að öðru frumvarpi sé ætlað að tryggja fyrirsjáanleika í greininni til lengri tíma.
„Það er væntanlegt frumvarp þess efnis í haust, þar sem þetta verður skoðað í stóra samhenginu og komið með tilbúið frumvarp sem á að tryggja 48 daga til framtíðar,“ segir Lilja Rafney.
Þá stendur til að ráðast í heildræna endurskoðun á 5,3%-kerfinu, skel- og rækjubótum og línuívilnun. Ekki hafi náðst næg samstaða með stjórnarandstöðunni um þessa þætti upphaflega frumvarpsins. Því var ákveðið að vinna áfram að málinu og kynna nýtt frumvarp í haust sem endurspegli vilja stjórnvalda í málinu.
„Það er auðvitað verið að geyma þetta fyrst og fremst og meta þá gagnrýni betur sem hefur komið fram. En það hefur auðvitað legið ansi lengi fyrir að rækju- og skelbætur eru orðnar barn síns tíma og kominn tími til að endurskoða þá hluti. Varðandi línuívilnun, þá hafa menn ýmsar hugmyndir um hvernig mætti koma því í betra horf svo það nýtist sem best þeim sem eru í þessum sjávarþorpum og minni bátum – að það verði svona sem best nýtt sem byggðaúrræði. En þetta verður allt tekið undir þessa skoðun og kemur þá fram í nýju frumvarpi í haust,“ segir Lilja Rafney.
Geymið þið þessi atriði til að skoða þau betur með minnihlutanum á þingi?
„Við erum auðvitað alltaf opin fyrir því að reyna að ná samstöðu, sem bestri samstöðu, en við getum aldrei lofað því fyrir fram að hún náist. En við munum reyna hvað við getum til að gera það. Það kemur í ljós hvernig það gengur.“
Varhugavert að veita ráðherra heimild til að fá lán úr 5,3%-kerfinu
Minni hluti atvinnuveganefndar fagnar þeirri niðurstöðu meiri hlutans að falla frá afnámi línuívilnunar og skel- og rækjubóta í nefndaráliti sínu. Í því segir að niðurfellingin hefði valdið því að heilsársstörfum í Breiðafirði og Húnaflóa hefði fækkað á kostnað mögulegra sumarstarfa. Jón Gunnarsson, Bergþór Ólason og Guðrún Hafsteinsdóttir eiga sæti í nefndinni fyrir hönd minni hlutans.
Í álitinu segir minni hluti nefndarinnar heimild ráðherra til að sækja strandveiðiheimildir úr byggðakvótakerfinunum varhugaverða.
„Þrátt fyrir að málið hafi batnað mjög í meðförum nefndarinnar gerir minni hlutinn athugasemdir við það sem eftir stendur í frumvarpinu, þ.e. að veita ráðherra heimild til að fá að „láni“, úr svokölluðu 5,3% kerfi, allt að 2.700 tonna aflamark í þorski til ráðstöfunar í strandveiðiafla á yfirstandandi fiskveiðiári,“ segir í álitinu.
Að mati minni hlutans verði erfitt fyrir ráðherra að finna það aflamark sem þurfi svo reikningsdæmið gangi upp.
„Í nefndaráliti meiri hlutans er áréttaður sá vilji hans að við úthlutun jöfnunarheimilda verði tryggt að hún komi ekki niður á sértækum byggðakvóta Byggðastofnunar. Af því tilefni bendir minni hlutinn á að þá er ekki margt sem stendur eftir handa ráðherra til að færa á milli úrræða innan 5,3% kerfisins. Í engu er vikið að þeim vanda sem blasir við vegna fyrirhugaðrar lántöku ráðherra og hvernig eigi að gjalda keisaranum það sem keisarans er þegar allt kemur til alls.“
Fréttin hefur verið uppfærð með tilvísun í nefndarálit minni hluta atvinnuveganefndar.
