Frönsk stjórnvöld hafa bannað lögreglu tímabundið að nota hvellsprengjur við störf sín í mótmælum nemenda sem staðið hafa yfir í tæpar tvær vikur. Ástæðan er að mótmælendur hafa slasast við notkun slíkra sprengja, sem hefur leitt af sér ásakanir um að lögreglan gangi of langt í störfum sínum.
Laurent Nunez innanríkisráðherra Frakklands tilkynnti þetta í morgun og sagði að þetta bann stæði þangað til ljóst væri að fullu hvað hefði gerst í þeim tilfellum þegar fólk slasaðist. Bannið gildir einungis um mótmæli framhaldsskólanema.
Einn missti hönd og annar nokkrar tennur
Alvarlegasta slysið varð á mánudaginn þegar 15 ára nemi missti hönd af völdum slíkrar sprengju. Heimildum ber ekki saman um hvort henni hafi verið skotið á hann eða hann hafi tekið sprengjuna upp. Móðir piltsins heldur því fyrrnefnda fram. Í síðustu viku var slíkri sprengju skotið á 14 ára nema af svo stuttu færi að hann missti nokkrar tennur. Lögreglumaður hefur þegar verið kærður vegna þess atviks. Alls eru 18 mál til rannsóknar hjá innra eftirliti lögreglunnar vegna starfa hennar í mótmælunum.
Um 250 þúsund manns mótmæltu víða um Frakkland í gær og kröfðust betri aðbúnaðar í framhaldsskólum. Þetta voru fjölmennustu mótmælin hingað til. Hátt í 500 manns voru handteknir og alls hafa 6.500 verið handteknir frá því að mótmælin hófust. Á þeim tíma hafa minnst 215 nemendur, 85 starfsmenn framhaldsskóla og 715 lögreglumenn slasast.
Emmanuel Macron forseti Frakklands og Sébastien Lecornu forsætisráðherra héldu neyðarfund í gærkvöld og ætlar sá síðastnefndi að ávarpa þjóðina í dag.
