Elín Björg Ragnarsdóttir fiskistofustjóri leitar logandi ljósi að nýju húsnæði fyrir starfsfólk sitt. Fiskistofa, ásamt fjölmörgum öðrum ríkisstofnunum, hafa haft aðsetur á Borgum á Akureyri. Þar hefur ítrekað fundist mygla.
Myglu varð fyrst vart árið 2024 og stofnanir hafa flúið unnvörpum. Viðgerð á húsnæðinu átti að vera lokið á vordögum og Fiskistofa hafði komið sér fyrir á ný þegar mygla fannst aftur.
„Við erum að skoða stöðuna enn þá. Ég á fund með reitum 6. júlí þar sem við skoðum nýtt húsnæði fyrir Fiskistofu til bráðabirgða. Borgir eru frábær aðstaða og frábær staðsetning en það verður auðvitað að koma húsinu í lag þannig við getum verið þar áfram. Ég útiloka það ekkert ef það tekst að koma fyrir mygluna. Ég þarf að sjá jákvæða útkomu af sýnum áður en ég býð fólki þangað aftur,“ segir Elín Björg.
Stofnun atvinnuveganna öflug á landsbyggðinni
Um áramót verður Fiskistofa lögð niður í kjölfar nýs lagafrumvarps um Stofnun atvinnuveganna. Frumvarpið kveður á um að Fiskistofa, Matvælastofnun og Verðlagsstofa skiptaverðs verði sameinaðar í eina stofnun. Einnig er reiknað með að einhverjir starfsmenn Heilbrigðiseftirlita sveitarfélaganna starfi á hinni nýju stofnun.
Elín Björg segir að starfsemi Fiskistofu á Akureyri eigi eftir að eflast með tilkomu nýrrar stofnunar en einhverjir höfðu áhyggjur af því að stór hluti starfseminnar yrði fluttur til höfuðborgarsvæðisins.
„Það er úr lausu lofti gripið,“ segir hún. Nýtt fyrirkomulag eigi eftir að efla landsbyggðina. „Það verður öflug starfsemi um allt land og þetta mun frekar styðja landsbyggðina heldur en hitt. Við erum núna að leita að húsnæði fyrir nýja stofnun, sem við gerum ráð fyrir að verði með um 45-50 starfsmenn á Akureyri. Núna eru um 30 hjá Fiskistofu, ellefu hjá Matvælastofnun og við gerum ráð fyrir að til viðbótar komi einhverjir úr heilbrigðiseftirliti sveitarfélaganna sem koma líka inn í þessa nýju stofnun.“
