Ragnhildur Helgadóttir er lagaprófessor og rektor Háskólans í Reykjavík. Hún er fyrsti gestur þáttanna Sama viðtalið þar sem áhrifavaldurinn Patrikur Jaime og varafréttastjóri RÚV, Baldvin Þór Bergsson, taka viðtal við sömu manneskjuna í aðdraganda þjóðaratkvæðagreiðslunnar 29. ágúst. Þættirnir munu birtast vikulega í spilara RÚV og á hlaðvarpsveitum auk þess sem viðtölin verða send út á Rás 1.
Stjórnarskrárbreyting nauðsynleg
Ragnhildur segist vera þeirra skoðunar að breyta þurfi stjórnarskrá Íslands samhliða mögulegri inngöngu í Evrópusambandið. Ekki verði gengið lengra í framsali fullveldis til alþjóðlegra stofnanna án þess að slík heimild sé til staðar. Færa megi rök fyrir því að slíka breytingu hefði þurft að gera fyrr.
Hún segir ESB aðild fela í sér mun meira framsal valdheimilda en EES samningurinn. Stóri stjórnskipunarlegi munurinn sé að það sé sterkara yfirþjóðlegt vald í ESB.
Mikið ferli sem fór af stað 2009
Aðspurð hvað ferli fari í gang þegar viðræður við Evrópusambandið fari af stað segir hún að meðal annars þurfi að bera saman íslenska löggjöf við löggjöf ESB. Það sé misjafnlega flókið eftir málaflokkum en nauðsynlegt líka þar sem lítið beri í milli.
Hún bendir líka á að þegar löggjöf sé skoðuð í heild sinni geti vel komið upp sú staða að Íslendingar vilji sjálfir gera ákveðnar breytingar. Ráðuneytin sjái ef til vill gamla löggjöf sem nauðsynlegt sé að uppfæra. Spurningin sé sú hvort sjálfkrafa eigi að tala um það sem aðlögun að ESB.
Bíddu, ertu ekki rektor í háskóla?
Patrekur spurði Ragnhildi meðal annars hvernig ungt fólk sem ekki vildi að lesa langar skýrslur gæti leitað sér upplýsinga í aðdraganda atkvæðagreiðslunnar. Hún benti á að það mætti finna upplýsingar víða, meðal annars á Wikipediu. Patrekur brást snöggt við og spurði hvort rektor í háskóla væri að beina fólki inn á Wikipediu sem væri ekkert endilega örugg heimild. Að minnsta kosti væri vefsíðan ekki endilega gild heimild í ritgerðum í skólum.
Ragnhildur hló að þessu og sagði þetta góðan punkt. En það mætti hins vegar finna góðar upplýsingar með smá googli. Hún vonast til að ungt fólk setji sig inn í málið og kjósi, sama hvað það kýs, því miðaldra fólk eigi ekki að taka allar ákvarðanir fyrir þá sem eru ungir.
Segist ekki finna áhuga hjá fólki í kringum sig
Patrekur segir að hann finni ekki mikla spennu hjá fólki í kringum sig fyrir þessar kosningar. Áhuginn hafi verið meiri fyrir sveitastjórnarkosningarnar. Það sé líklegt að eldra fólk sé líklegra til að kjósa og þá sé mikilvægt að það hugsi um framtíðina, ekki bara um hagsmuni sína í dag.
