Samfélagsleg ákvörðun að fækka sjálfsvígum
Hvert sjálfsvíg kostar samfélagið um 500 milljónir, en lítið hefur verið lagt í forvarnir. Fyrstu aðgerðaáætlun gegn sjálfsvígum var stungið ofan í skúffu. Næstu áætlun fylgdi ekkert fjármagn. Nú er unnið er að framgangi þriðju áætlunarinnar. Guðrún Jóna Guðlaugsdóttir heldur utan um verkefnið, en hún missti son sinn í sjálfsvígi þegar hann var á fyrsta ári í MR. „Ég vil ekki trúa því að hann hafi viljað fara frá mér. En ég get vel skilið að hann hafi ekki treyst sér til að lifa.“
Aðgerðaáætlun gegn sjálfsvígum var sett fram hér á landi árið 2018. Þegar hún féll úr gildi árið 2025 höfðu aðeins 15 aðgerðir af 54 komist til framkvæmda. Ein meginskýringin var sú að aðgerðunum fylgdi ekki fjármagn, segir Guðrún Jóna Guðlaugsdóttir. Ótrúlegt en satt þá var það þó framför frá því sem áður var. „Fyrsta sjálfsvígsáætlunin var gerð árið 1996 og henni var stungið ofan í skúffu. Ákvörðun var tekin um að gera ekkert, því það kostaði of mikið. Þannig að það var skref í rétta átt þegar áætlunin var birt árið 2018 og ákveðið að setja peninga í starfsmann í heilt ár.“
Betur hefur gengið að fylgja eftir aðgerðaáætlun stjórnvalda 2025–2030, sem er mun einfaldari í smíðum en sú fyrri. Af 26 aðgerðum er vinna hafin við 15 þeirra. Guðrún Jóna stýrir þeirri vinnu sem verkefnastjóri sjálfsvígsforvarna hjá Lífsbrú – miðstöð sjálfsvígsforvarna hjá Embætti landlæknis.
„Aðgerðaáætlunin 2018 var svo víðfeðm, …
