Eignarhaldsfélag í eigu víetnamska viðskiptamannsins Quang Lé býður upp á flutningaþjónustu. Quang Lé rak fjölda veitingastaða í Reykjavík og hefur verið til rannsóknar hjá lögreglunni á höfuðborgarsvæðinu fyrir meint mansal. Fjöldi meintra brotaþola er meira en 30, segir Gunnar Axel Davíðsson lögreglumaður sem stýrir rannsókninni.
Fyrirtækið heitir NQ Moving og býður upp á þjónustu flutningsmanna sem hlaða og afferma flutningabíla. Hægt er að panta einn flutningsmann eða tvo og bifreið með.
Flutningsþjónustan er rekin í fyrirtækinu NQ fasteignir ehf. sem er í eigu Quang Lé. Þetta er fyrirtækið sem meðal annars átti Herkastalann svokallaða, hús hjálpræðishersins í Kirkjustræti í miðbæ Reykajvíkur. Upplýsingar um þetta koma fram á heimasíðu NQ Moving þar sem einnig er gefið upp símanúmer fyrirtækisins.
Fréttastofa reyndi að ná tali af Quang Lé með því að hringja í símanúmer flutningsfyrirtækisins. Starfsmaður sem svaraði sagði hann ekki vera við en staðfesti að fyrirtækið ræki flutningsþjónustu, eins og kemur fram á heimasíðunni. Þar er meðal annars hægt að óska eftir tilboði í flutninga.
Fréttastofa óskaði eftir því í símtali og tölvupósti að Quang Lé hefði samband til að ræða um starfsemi fyrirtækisins og aðstæður starfsmanna þess. Ekki var orðið við þeirra beiðni.
Stærsta mansalsrannsóknin
Staðan á rannsókninni á meintum brotum hans hefur nú staðið yfir í meira en tvö ár og það hyllir undir lok hennar. Gunnar Axel sagði um stöðu rannsóknarinnar í viðtali við fréttastofu fyrr í júní: „Þetta bara tekur tíma. [...] Það hyllir undir lokin. Einhvern tímann þarf allt að enda. [...] Á næstu mánuðum þá er markmiðið að senda þetta frá okkur til héraðssaksóknara.“
Rætt var við Gunnar Axel og fjallað var um stöðu rannsóknarinnar á máli Quang Lé í fréttaskýringaþættinum Þetta helst í júní. Hann sagði meðal annars frá því að þetta væri stærsta mansalsrannsókn sem komið hefði upp á Íslandi. Hlusta má á þáttinn hér:
Benz-flutningabíll keyptur
Fréttastofa spurði starfsmanninn sem svaraði í símann hjá NQ Moving hvenær rekstur flutningafyrirtækisins hefði hafist. Hann svaraði því ekki.
Í yfirliti um ökutækjaeign NQ fasteigna kemur fram að fyrirtækið eigi í dag einn Benz Sprinter-flutningabíl sem keyptur var í lok apríl, fyrir rúmum tveimur mánuðum. Á heimasíðu fyrirtækisins kemur fram að hægt er að leigja einn flutningsmann og Benz Sprinter-bifreiðina til að sinna flutningum fyrir 14 þúsund krónur á tímann auk virðisaukaskatts. Tveir flutningsmenn og bifreið kosta 18 þúsund krónur á tímann auk virðisaukaskatts.
Á heimasíðu fyrirtækisins eru myndir af þremur flutningabílum sem eru merktir fyrirtækinu NQ Moving. Aðeins einn bíll er skráður á félagið.
Seldi Herkastalann á 865 milljónir
Þetta er eina fyrirtækið sem enn er í rekstri sem Quang Lé tengist í dag, sem stjórnarmaður og/eða framkvæmdastjóri og prókúruhafi. Sjö önnur fyrirtæki sem hann er stjórnarmaður í eða framkvæmdastjóri hafa verið úrskurðuð gjaldþrota. Þetta kemur fram í yfirliti yfir félagaþátttöku hans.
Þessi sex fyrirtæki voru úrskurðuð gjaldþrota vorið 2024 eftir að fjallað var um mál hans í fjölmiðlum og rannsókn hófst. Þetta eru fyrirtæki eins og Vietnam Restaurant ehf. og Wokon ehf.
Fyrirtækið NQ fasteignir ætti að vera ágætlega statt miðað við eignastöðu þess árið 2024. Þá átti fyrirtækið enn þá Herkastalann í Kirkjustræti sem metinn var á tæpan hálfan milljarð króna í ársreikningi. Fyrirtækið seldi Herkastalann fyrir 865 milljónir króna í fyrra, samkvæmt fréttum í fjölmiðlum.
Kostnaður getur fallið á ábyrgðarsjóð launa
Afleiðingarnar af meintum brotum Quang Lé síðustu ár hafa verið talsverðar. Meira en 30 meintir brotaþolar hafa farið í skýrslutöku hjá lögreglu og stór hluti þeirra hefur reynt að leita réttar síns gagnvart fyrirtækjum hans vegna þess að grunur er um að þeir hafi verið sviknir um laun og á þeim með brotið með öðrum hætti.
Verkalýðsfélagið Efling greindi frá því í vikunni að sigur hefði unnist í máli fyrrverandi starfsmanns fyrirtækis Quang Lé. Landsréttur kvað upp dóm um að starfsmaðurinn ætti að fá tæplega 20 milljónir króna úr þrotabúi veitingastaðarins Vietnam Restaurant vegna vangoldinna launa. Mál þessa manns hefur fordæmisgildi fyrir aðra starfsmenn sem Quang Lé er talinn hafa brotið gegn, segir Efling.
Orðrétt sagði í fréttatilkynningu Eflingar um dóminn: „Afar þýðingarmikill sigur vannst fyrir Landsrétti í gær þegar dómurinn úrskurðaði í máli manns sem unnið hafði hjá veitingastaðnum Vietnam restaurant áður en staðurinn var tekin til gjaldþrotaskipta. Viðurkenndi dómurinn meðal annars að launakröfur mannsins skyldu ná til yfirvinnu hans og sneri þar með við úrskurði Héraðsdóms Reykjavíkur. Er um gríðarlega mikið hagsmunamál að ræða, bæði fyrir umræddan mann, en einnig fyrir um á fjórða tug annarra starfsmanna, þar á meðal Eflingarfélaga, sem bíða úrlausnar sinna mála.”
Óvíst er hvort þrotabú fyrirtækis Quang Lé getur greitt þessum starfsmanni og öðrum þessa peninga til baka. Mögulegt er að á endanum þurfi þessi starfsmaður og aðrir að fá hluta til baka úr Ábyrgðarsjóði launa. Hvort Quang Lé og fyrirtæki hans greiddu peninga til Ábyrgðarsjóðs launa, eins og þau áttu að gera, meðan þau voru í rekstri liggur ekki fyrir. Hluti af kostnaðinum við þennan hluta starfsemi fyrirtækja Quang Lé gæti því á endanum fallið á sameiginlega sjóði í samfélaginu eins og Ábyrgðarsjóð launa.
