Leikkonan Sharon Stone man vel eftir stundinni þar sem hjónabandi hennar og blaðamannsins Phils Bronstein lauk. Þau voru þá stödd á heimili sínu ásamt lækni sem hafði fundið æxli í brjóstum leikkonunnar. Ekki var ljóst á þessum tíma hvort æxlin væru góð- eða illkynja en læknirinn vildi hafa vaðið fyrir neðan sig og ráðlagði leikkonunni að gangast undir tvöfalt brjóstnám.
„Annað æxlið var stærra heldur en allt vinstra brjóstið mitt,“ sagði leikkonan í hlaðvarpinu The Person Who Believed in Me á mánudaginn.
„Læknirinn kom heim til okkar og sagði: Sko, við metum það svo að þú ættir að gangast undir tvöfalt brjóstnám. Staðan er ekki góð. Yfirleitt þegar við finnum æxli af þessari gráðu vitum við fyrirfram að um krabbamein sé að ræða.“
Stone vildi þó ekki trúa því að æxlin væru illkynja. Hún sagði við lækninn: „Ég er ekki með krabbamein.“
Læknirinn benti henni á að þetta væri ekki eitthvað sem hún gæti bara ákveðið en leikkonan þrjóskaðist við: „Víst. Ég fæ að ákveða þetta og ég er búin að ákveða mig.“
Engu að síður ákvað Stone að samþykkja aðgerðina en þáverandi eiginmaður hennar brást þá ókvæða við.
„Eiginmaður minn sagði: Þetta er fáránlegt. Og svo stóð hann upp og rauk á dyr.“
Maður hennar var ekki reiður yfir því að kona hans væri kannski með krabbamein. Hann var reiður yfir því að hún væri að íhuga að láta fjarlægja bæði brjóstin.
„Hann varð brjálaður“
Læknirinn lét blaðamanninn þá heyra það: „Læknirinn sagði við hann: „Ef ég væri með fleiri sjúklinga eins og hana þá væru fleiri konur á lífi í dag. Þú þarft að fá þér sæti“, og ég sagði: „Það er ég sem ákveð þetta en ekki þú.“
Skaðinn var þó skeður. Þarna vissi Sharon Stone að hjónabandi hennar væri lokið. „Þetta voru endalok hjónabandsins. Bara si svona. Hann var kominn með nóg af mér. Þetta var búið. Þessu lauk bara þarna inni í herberginu. Maður gat bara skynjað það. Þetta var búið. Þetta var bara búið. Honum fannst ég fáránleg. Honum fannst þetta kjánalegt. Honum fannst ég vera að taka of margar ákvarðanir sjálf.“
Örlögin eru stundum kaldhæðin en það kom síðar í ljós að um góðkynja æxli var að ræða. Þau voru fjarlægð með skurðaðgerð og leikkonan ákvað að fá sér í leiðinni brjóstapúða til að halda útliti brjóstanna. Skurðlæknirinn ákvað þó að koma fyrir stærri púðum en Stone hafði samþykkt.
„Þegar umbúðirnar voru teknar uppgötvaði ég að ég hafði farið upp um heila skálastæðr, læknirinn vildi meina að þessi stærð færi betur við mjaðmirnar mínar. Hann breytti líkama mínum án minnar vitneskju og samþykkis.“
Bæði eiginmaður hennar fyrrverandi og skurðlæknirinn töldu sig vita betur en leikkonan hvernig brjóst hennar ættu að vera. Maður hennar vildi frekar að hún væri með krabbamein en flatbrjósta og skurðlæknirinn taldi rétt að virða vilja leikkonunnar að vettugi því hann sjálfur var sannfærður um að hún væri flottari með stærri brjóst.
