Runólfur Pálsson, forstjóri Landspítala, segir nýlegan dóm í máli ekkju Andemariams Beyene gegn íslenska ríkinu þungbæran.
Dómur féll í héraðsdómi á fimmtudag. Í dómnum var ríkið dæmt bótaskylt. Þar sagði meðal annars að Tómas Guðbjartsson læknir hefði gerst uppvís um stórfellt gáleysi og brotið gegn þágildandi læknalögum við meðferð Andemariams. Hann var sendur til Svíþjóðar í plastbarkaígræðslu árið 2011 og lést tveimur og hálfu ári síðar.
Tómas er í leyfi frá störfum á Landspítala. Runólfur segir að koma verði í ljós hvort Tómas snúi aftur til starfa og segir ótímabært að svara hvort spítalinn beri traust til hans. Runólfur segir ljóst að verkferlum hafi ekki verið fylgt við tilvísun til Karólinska sjúkrahússins í Stokkhólmi en sjúkrahúsið ytra og læknar þar beri mesta ábyrgð.
