Dómsmálaráðherra segir enn óútfært hvaða lögregluembætti verða sameinuð þegar þeim verður fækkað úr níu í fjögur eða fimm. Ráðherra boðaði þessar breytingar í gær. Í dag fundaði hún með lögreglumönnum á Austurlandi, það var fyrsti fundurinn á hringferð um landið til að kynna áformin.
Þorbjörg Sigríður Gunnlaugsdóttir dómsmálaráðherra segir markmið breytinganna ekki vera hagræðingu heldur eigi færri og stærri lögregluembætti eftir að skila sterkari löggæslu.
„Það liggur fyrir núna ákvörðun um það að við ætlum að fara í fjögur til fimm embætti, það er einlæg skoðun mín og afstaða að þetta muni styrkja lögregluna alls staðar á landinu.“
„En ég hef líka verið alveg skýr með það að við erum ekki að fækka starfstöðvum hringinn í kringum landið. Óbreyttur fjöldi þar. Við erum ekki að fækka lögreglumönnum.“
„Við ætlum ekki að fara í sameiningarfasa þar sem höfuðborgin bendir á landsbyggðir og segir nú farið þið og sameinið. Höfuðborgarsvæðið og suðvesturhornið er ekki undanskilið,“ segir Þorbjörg Sigríður.
Hún segir sameiningar enn óútfærðar og fundi með lögreglumönnum um landið vera haldna til þess að heyra þeirra sjónarmið. Hún hafi ekki reifað hugmyndir um ný mörk embætta á fundinum í dag. „Ég sagði hins vegar að þau mörk sem eru embætta á milli, að ég sé opin fyrir því að skoða þau. Eins og ég segi; ég er komin hingað til þess að hlusta. Ég tek auðvitað á endanum ákvörðunina, ábyrgðin er mín en ég er að kalla eftir sjónarmiðum.“
Það eina sem lögreglumönnum líki verr en breytingar sé óbreytt ástand
Kristmundur Stefán Einarsson, lögreglustjóri á Austurlandi, segir áformin leggjast ágætlega í hópinn og umræður hafa verið gagnlegar.
„Það var ýmislegt rætt á þessum fundi og margt jákvætt og annað sem felur í sér áskoranir. Svona heilt yfir þá held ég að þetta séu hugmyndir sem flestum lítist ágætlega á og mér sjálfum líst vel á að efla embættin, fækka og styrkja og ég held að það sé sóknarfæri í því fyrir lögreglu í landinu að gera tillögur ráðherra að veruleika,“ segir Kristmundur.
Óskar Þór Guðmundsson, rannsóknarlögreglumaður, sem sat fundinn með dómsmálaráðherra tekur undir það að hugmyndirnar hafi lagst þokkalega í hópinn.
„Lögreglumenn almennt eru ekki mikið fyrir breytingar. Ef það er eitthvað sem þeir hafa meiri áhyggjur af þá er það óbreytt staða. Það er bara misjafnt hvað fólki finnst en almennt séð held ég að menn hafi ekki stórar áhyggjur af þessu,“ segir Óskar.
Komu áhyggjum af stöðu landamæraeftirlits til skila
Óskar Þór stýrir landamæraeftirliti á Seyðisfirði. Stórfelldum fíkniefnamálum sem hafa komið upp á landamærunum þar hefur fjölgað mikið síðustu misseri. Í mars fundust 43 kg af kókaíni í bíl sem kom til landsins með Norrænu, það er meira magn kókaíns en hefur nokkurn tíma verið lagt hald á í einu og sama máli hér á landi.
Þá hafa dómar þegar fallið í fimm málum sem upp komu á síðasta ári og teljast til stórfelldra fíkniefnamála. Óskar segist vongóður um að samhliða stækkun og fækkun lögregluembætta verði hægt að bæta aðstöðu til landamæraeftirlits.
„Aðstaðan okkar er ökutæki, landamærabifreið sem er í rauninni skrifstofa á hjólum. Við teppum eitt pláss tollgæslunnar með þessari bifreið og það er aðstaða lögreglunnar á Seyðisfirði.“
Ertu vongóður um að úr verði bætt?
„Já, ég er bjartsýnn að eðlisfari. Við erum búin að koma okkar áhyggjum til ráðherra og ég veit að þau vita hvernig staðan er þannig að ég er bara bjartsýnn á að það verði bætt úr þessu.“
Þorbjörg Sigríður segir úrbætur á aðstöðunni á Seyðisfirði forgangsmál í dómsmálaráðuneytinu. „Ég hef sagt og sagði það við þennan hóp hérna í dag að við erum að kortleggja stöðu húsnæðismála hjá lögreglunni allri. Það eru alltaf tveir staðir sem standa upp úr, þar sem staðan er áberandi verst, það er á Seyðisfirði og það er á Ísafirði. Þessir tveir staðir eru í forgangi í dómsmálaráðuneytinu en við erum að vinna úr þessum greiningum.“
