Evrópa hlýnar tvöfalt hraðar en önnur svæði heimsins af völdum loftslagsbreytinga. Ný stöðuskýrsla evrópsku loftslagsstofnunarinnar Kóperníkusar fyrir árið 2025 í Evrópu var birt í morgun. Þar kemur fram að hlýrra var en í meðallagi í 95% landa álfunnar.
Árið var það hlýjasta eða næsthlýjasta frá upphafi mælinga í nokkrum löndum Norður-Evrópu, meðal annars Svíþjóð, Finnlandi, Noregi, Bretlandseyjum og Íslandi. Loftslagsbreytingarnar leiða af sér auknar öfgar í veðri, minna frost, fjölgun hitabylgja, þurrka, úrhellis og flóða, segir í skýrslunni.
Kóperníkus segir helstu birtingarmynd hlýindanna vera víðfeðma gróðurelda í ríkjum Evrópusambandsins síðasta vor og sumar.
Yfir tíu þúsund ferkílómetrar lands urðu eldunum að bráð, 40% prósent þess var á Spáni. Aldrei hefur jafnstórt landsvæði í Evrópu brunnið á einu ári og í fyrra og aðeins þrisvar frá 2010 hafa eldar grandað stærra svæði en fimm þúsund ferkílómetrum.
Spænska ríkisstjórnin tengir gróðureldana beint við loftslagsbreytingar og vísindamenn segja hættuna aukast vegna hækkandi hitastigs og meðfylgjandi þurrkatíðar.
Minna vatn var í fljótum Evrópu en að meðaltali ellefu mánuði síðasta árs og yfirborðshiti hafsvæða hefur aldrei mælst hærri. Heldur dró úr ofsaveðrum og flóðum í fyrra þótt þúsundir yrðu fyrir barðinu á þeim.
