Lindu Benediktsdóttur þarf vart að kynna fyrir landsmönnum, sérstaklega þeim sem hafa áhuga á matargerð. Hún er einn fremsti matgæðingur og uppskriftahönnuður landsins og rekur uppskriftasíðuna lindaben.is þar sem hún deilir uppskriftum að gómsætum réttum. Auk þess hefur hún þróað eigin línu af bakstursvörum og smákökum sem notið hafa mikilla vinsælda.
Eldhúsið er þó ekki eini vettvangurinn þar sem Linda nýtur sín því hún er einnig mikill kylfingur og ver drjúgum tíma á golfvellinum, bæði hér heima og erlendis. Það var eiginmaður hennar, Ragnar Einarsson, sem kynnti henni golfið á sínum tíma og síðan þá hefur áhuginn farið ört vaxandi. Saman eiga hjónin tvö börn, þau Róbert og Birtu, sem eru bæði byrjuð að æfa golf.
„Ragnar hefur verið í golfi frá því að hann var barn þannig að það fylgdi eiginlega pakkanum þegar við byrjuðum saman að ég myndi á einhverjum tímapunkti prófa golf líka. Til að byrja með fannst mér golf samt frekar tímafrek íþrótt. Einn golfhringur tekur auðveldlega fjóra tíma og það er ekki eitthvað sem maður sér í mörgum öðrum íþróttum. Þegar börnin voru lítil höfðum við heldur ekki mikinn tíma. Áhuginn kviknaði svo almennilega þegar við fórum að taka golfsettin með okkur erlendis. Það er eitthvað svo notalegt við að vera saman í góðu veðri, úti að ganga, spjalla og njóta stundarinnar. Það skipti í raun engu máli hvernig við vorum að spila, þetta varð meira upplifun og dýrmæt samvera. Þar kviknaði golfáhuginn hjá mér fyrir alvöru,“ segir Linda þegar hún er spurð hvernig golfáhuginn kviknaði.
„Ég er mjög keppnismiðuð“
Linda segir það ekki aðeins vera leikinn sjálfan sem heilli sig við golfið heldur einnig allt sem fylgir sportinu, allt frá útiverunni og félagsskapnum yfir í stemninguna á vellinum. „Ég heillaðist fyrst og fremst af stemningunni í kringum golfið. Náttúran, félagsskapurinn og auðvitað sætu golffötin. Svo er golf líka þannig íþrótt að maður er alltaf aðeins að reyna að bæta sig. Ég er mjög keppnismiðuð gagnvart sjálfri mér og það heillar mig mikið.“
Aðspurð segist Linda hingað til helst hafa verið það sem hún kallar „dekurgolfari“ og að mestu spilað erlendis í sól og hlýju. Í sumar ætlar hún hins vegar að vera duglegri að láta sjá sig á íslenskum golfvöllum. „Ég er í fyrsta skipti skráð í golfklúbb núna í sumar. Hingað til hef ég verið dekurgolfari og aðallega spilað erlendis í sól og tuttugu stiga hita þannig að það verður mjög spennandi að sjá hvernig íslenska golfsumarið tekur á móti mér. Ég vona bara að veðrið í Mosfellsbænum verði mér hliðhollt svo ég komist sem oftast út á völlinn í stuttermabol.“
Linda segist vera með ákveðin markmið fyrir golfsumarið þó að aðalatriðið sé alltaf að njóta þess að vera úti á vellinum. Hún ætlar meðal annars að leggja meiri áherslu á púttið á komandi tímabili.
Ertu enn að fullkomna sveifluna?
„Ég held að maður hætti aldrei að vinna í sveiflunni. Ég elska að bæta mig en með árunum hef ég líka lært að taka hlutina aðeins minna alvarlega. Ég tek golfið ekkert of alvarlega og stundum sleppi ég bara að telja. Mér finnst mikilvægast að hafa gaman.“
Seturðu þér markmið í golfinu, eins og að lækka forgjöf eða ná ákveðnum árangri?
„Ég var lengi að glíma við að boltinn færi alltaf of mikið til hægri hjá mér en mér finnst ég loksins vera að ná aðeins betri stjórn á því. Núna er markmiðið helst að verða betri í að pútta. Ég hef ekki æft það nógu mikið og mér finnst líka alltaf jafn merkilegt hvað pútt geta verið mismunandi eftir því hvernig flatirnar eru. Það þarf stundum alveg ótrúlega mismunandi kraft.“
Linda hlakkar mikið til golfsumarsins og í fyrsta sinn ætlar hún að taka þátt í golfmóti.
„Ég hef alltaf litið á golfið fyrst og fremst sem skemmtun en í sumar ætla ég í fyrsta sinn að taka þátt í golfmóti. Það verður á Spáni hjá vinum okkar sem eru að gifta sig og eru bæði miklir golfarar. Ég er ótrúlega spennt fyrir því.“
„Við elskum að spila saman“
Eins og fram kom í byrjun var það eiginmaður Lindu sem kynnti henni golfið á sínum tíma og í dag skipar íþróttin stóran sess í lífi þeirra hjóna.
„Við elskum að spila saman. Þetta er alveg geggjaður tími fyrir okkur, að vera saman úti, spjalla, hlæja og stefna að sama markmiði. Við erum líka mjög dugleg að hvetja hvort annað áfram sem gerir þetta enn skemmtilegra. Þetta er líka mikill gæðatími með krökkunum þegar þau koma með.“
Linda viðurkennir að vera mikil keppnismanneskja þó að hún segist fyrst og fremst keppa við sjálfa sig.
„Ég er mjög mikil keppnismanneskja en ég keppi nánast bara við sjálfa mig. Ég grínast stundum með að ég ætli að verða betri en Ragnar í golfi og að hann þurfi að passa sig. Þar er þó ansi brött brekka fyrir mig þar sem hann hefur æft frá barnæsku og er með mjög lága forgjöf. Ég þarf líklega að æfa mig ansi mikið áður en ég næ honum.“
Hvernig fellur golfið inn í daglegt líf hjá þér?
„Það þarf alveg að forgangsraða golfinu, sérstaklega þegar maður er með fjölskyldu og mikið að gera. Það hefur þó orðið auðveldara núna þar sem krakkarnir eru líka byrjaðir að æfa golf. Þá verður þetta meira fjölskylduíþrótt þar sem allir geta notið þess að vera saman úti á vellinum. Við erum líka dugleg að fá vini okkar með í golfið og þannig hefur það í raun orðið stór hluti af félagslífinu.“
„Nauðsynlegt að vera vel nærð“
Aðspurð segir Linda golfið og matarástríðuna spila vel saman.
„Golfið snýst svo mikið um upplifunina í kringum leikinn. Góður matur og drykkur er klárlega hluti af því hjá mér. Það er alveg nauðsynlegt að vera vel nærð áður en haldið er út á völl. Þegar ég spila erlendis finnst mér til dæmis alltaf mjög notalegt að byrja á góðri samloku og kaffi í klúbbhúsinu áður en lagt er af stað. Eftir hring er svo auðvitað klassískt að fá sér góðan mat og drykk og njóta aðeins.“
Hvað hefur golfið kennt þér sem nýtist í daglegu lífi?
„Golfið hefur líklega kennt mér að taka lífinu aðeins léttar. Stundum fer boltinn allt annað en maður ætlaði sér og þá er eiginlega best að hlæja bara að því og halda áfram. Mér finnst það eiga mjög vel við lífið sjálft líka.“
Blaðamaður varð að sjálfsögðu að forvitnast um hvort Linda ætti einhverjar fyndnar golfsögur.
„Ég á nokkrar mjög góðar og fyndnar sögur. Nýlega keypti ég mér geggjað flott golfpils og mætti á völlinn, auðvitað algjör megaskvísa í nýja pilsinu. Við höfðum verið að drífa okkur um morguninn og ég hljóp nánast út úr húsi án þess að líta í spegil. Þegar á golfvöllinn var komið fór ég inn í klúbbhúsið til að kaupa samlokur fyrir okkur Ragnar og þar var allt troðfullt af fólki. Ég gekk fram hjá stórum hópi af eldri golfherrum og allt í einu kom einn þeirra labbandi á eftir mér. Ég skildi ekkert hvað hann vildi fyrr en hann stoppaði mig og sagði mjög kurteislega: „Excuse me darling, but you have a tag out on your skirt.“ Ég hafði sem sagt gleymt að taka miðann af pilsinu,“ segir hún og hlær áður en hún rifjar upp aðra sögu.
„Ein fyndnasta sagan var svo þegar ég fór með systur minni í golf en hún var nýbyrjuð og við báðar frekar óöruggar einar á vellinum. Ég var með svo mikla hálsbólgu að ég gat varla talað og sagði því við hana áður en ég sló: „Hildur, vertu tilbúin að öskra FOR ef ég hitti rosa vel“. Það fór ekki betur en svo að boltinn fór svona tvo metra áfram og enginn var í nokkurri hættu. Við hlógum svo mikið að þessu að nú köllum við alltaf „FOR“ í gríni þegar önnur okkar slær sérstaklega illa.“
Í lokin var Linda beðin um að lýsa sér sem golfara í þremur orðum og svarið lét ekki á sér standa: „Nautnaseggur með keppnisskap“.
