Á tímum sem þessum þar sem mönnum eru seldar þær hugmyndir að þeir þurfi nauðsynlega að fara til Istanbúl í Tyrklandi til þess að afmá skallann má minna á að kynþokki hefur ekkert með hár að gera. Kynþokkafyllstu karlar heims hafa oft verið sköllóttir enda byrjar líklega engin kona með manni því hann sé með svo smart hárlínu.
Af því tilefni tók Smartland saman lista yfir sköllótta menn sem eru löðrandi af kynþokka.
Atli Steinn Guðmundsson
Atli Steinn blaðamaður á Morgunblaðinu þykir heitur. Hann var eitt sinn með sítt hár niður á bak en það er langt síðan að hann lét hárið fjúka. Allir sem þekkja Atla Stein vita að þykkur makki myndi ekki bæta neinu við hans persónutöfra. Svo ekki sé minnst á það að sítt hár myndi bara flækjast fyrir honum í hans daglega amstri.
Magnús Ragnarsson
Leikarinn og ævintýramaðurinn Magnús Ragnarsson er búinn að vera með skalla síðan elstu menn muna. Magnús hefur leikið í mörgum af vinsælustu sjónvarpsþáttum landsins og hefur rödd hans hljómað á öldum ljósvakans. Síðustu ár hefur Magnús gert hitt og þetta og verið maðurinn bak við tjöldin. Það alversta sem hann gæti gert í lífinu væri að panta sér ferð til Tyrklands.
Björn Brynjúlfur Björnsson
Björn Brynjúlfur Björnsson framkvæmdastjóri Viðskiptaráðs er mikill spaði. Hann er sköllóttur og það fer honum feykilega vel. Til jafnvægis við hárleysið er hann stundum með þriggja til fjögurra daga skegg sem er alltaf góð hugmynd!
Arnar Sigurðsson
Áfengissalinn í Santé!, Arnar Sigurðsson, hefur verið sköllóttur lengi og fer það honum prýðilega vel. Hann er elskaður og dáður af öllum búbbluelskandi konum landsins sem vilja ekki setja skólpvatn inn fyrir sínar varir og hefur það ekkert með hárið að gera.
Árni Páll Árnason
Rapparinn Herra Hnetusmjör er alltaf með rakaðan koll. Það er hluti af stílnum að vera ekki með hár enda væri of mikið að vera með permanett, húðflúr, gulltennur og sólgleraugu. Það er líka of heitt að vera með þykkan makka þegar hver einasti miði í salanum er seldur á toppverði.
Birnir Sigurðsson
Rapparinn Birnir er líka krúnurakaður og hefur verið lengi. Hann hefur einstakan stíl og myndi sítt hár ekki passa við þá sviðsmynd sem hann hefur teiknað upp.
Logi Einarsson
Ráðherra menningarmála, Logi Einarsson, er með skalla og skegg og hefur verið lengi. Hann var reyndar með hár þegar hann var dansari í hljómsveitinni Skriðjöklum en það er önnur saga. Logi leggur mikið upp úr því að vera snyrtilegur til fara og kaupir öll sín föt á Akureyri.
Benedikt Erlingsson
Leikarinn og leikstjórinn hefur verið með skalla lengi. Hann var síðast með hár löngu áður en hann sló í gegn í grínþáttunum Fóstbræðrum. Sérfræðingar eru sammála um að skallinn fari honum töluvert betur og hann sé mun heitari án hárs.
Egill Ólafsson
Eitt helsta kyntákn þjóðarinnar, leikarinn og söngvarinn Egill Ólafsson, hefur ekki verið með hár síðan hann lék pabbann í Jóni Oddi og Jóni Bjarna. Eitt besta atriðið í íslenskri kvikmyndasögu er einmitt í kvikmyndinni Jón Oddur og Jón Bjarni. Þar er Egill í hlutverki pabbans og lendir í bobba þegar kemur í ljós að fötunum hans hefur verið stolið í útiklefa Vesturbæjarlaugarinnar.
Gylfi Þór Þorsteinsson
Oddviti Viðreisnar í Mosfellsbæ og verkefnastjóri hjá Rauða krossinum er sköllóttur og fer það honum sérlega vel. Hann er stundum með þriggja daga skegg sem passar vel við skallann. Gylfi er alltaf léttur og kátur og kemur samferðafólki sínu yfirleitt til að hlæja með sinni léttu lund.
Auðunn Blöndal
Auðunn Blöndal, eða Auddi Blö eins og hann er kallaður, er búinn að vera svo lengi í fjölmiðlabransanum að fólk man eftir honum með hár. Hann var til dæmis með hár í þættinum 70 mínútur þar sem hann sló eftirminnilega í gegn.
