Réttarhöld yfir Hannes Valle Þorsteinssyni, fyrrverandi starfsmanni leikskólans Múlaborgar, sem ákærður er fyrir tvö kynferðisbrot gegn barni á leikskólanum, hafa staðið yfir í dag í Héraðsdómi Reykjavíkur. Þinghald er lokað og liggja engar upplýsingar fyrir um það sem komið hefur fram við réttarhöldin.
Sjá einnig: Réttarhöld yfir Hannes Valle framundan
Hannes hefur hins vegar í lögregluyfirheyrslum játað sök að hluta. Vísir fer yfir játningar hans í frétt í dag og byggir á upplýsingum úr gæsluvarðhaldsúrskurðum.
Kemur þar fram að Hannes játar að hafa sett getnaðarlim sinn á milli læra barnsins og viðhaft samfarahreyfingar, eftir að hafa dregið niður buxur stúlkunnar þar sem hún lá sofandi í hvíldarherbergi leikskólans.
Í annarri yfirheyrslu játaði hann að hafa tekið stúlkuna upp á meðan hún var buxnalaus og „snúið henni við þannig hún sneri rassinum að klofi hans og hafi hann gert „hump“ hreyfingar í nokkrar sekúndur.“
Játningar Hannesar eru sagðar vera í samræmi við frásögn barnsins af atvikunum.
Dómur yfir lok maí
Búast má við því að dómur verði kveðinn upp yfir Hannesi seinnihluta maímánaðar, en dóm skal kveða upp innan við fjórum vikum frá aðalmeðferð.
Hannes gæti verið ákærður fyrir fleiri kynferðisbrot á leikskólanum síðar því ríkissaksóknari hefur fellt úr gildi ákvarðanir um að fella niður rannsókn eða ákæra ekki gegn honum í nokkrum málum sem tilkynnt voru til lögreglu. Hefur ríkissaksóknari fyrirskipað lögreglu að rannsaka þrjú af þessum málum upp á nýtt.
