Að minnsta kosti 21 hefur verið tekinn af lífi og 4.000 verið handteknir í Íran eftir að stríðið í Mið-Austurlöndum hófst 28. febrúar með loftárásum Bandaríkjanna og Ísraels á Íran.
Níu hið minnsta hafa verið tekin af lífi í tengslum við mótmæli sem skóku landið í byrjun árs, tíu fyrir meinta aðild að stjórnarandstöðuhópum og tveir fyrir njósnir. Þetta kemur fram í tilkynningu frá mannréttindaskrifstofu Sameinuðu þjóðanna.
Stofnunin áætlar að rúmlega 4.000 manns hafi verið handteknir á sama tíma. Margir þeirra sem handteknir voru hafi verið pyntaðir eða þurft að þola grimmilega, ómannúðlega og vanvirðandi meðferð, meðal annars nauðugar játningar, sem stundum var sjónvarpað, og sýndaraftökur.
„Mér blöskrar yfir því að írönsk stjórnvöld haldi áfram að svipta Írana réttindum sínum á harkalegan og grimmilegan hátt, ofan á þær alvarlegu afleiðingar sem átökin hafa þegar haft. Ég hvet yfirvöld til að stöðva allar aftökur, stöðva dauðarefsingar, tryggja réttláta málsmeðferð og réttarhöld og leysa þá úr haldi tafarlaust sem handteknir eru af handahófi,“ segir Volker Turk, yfirmaður mannréttindaráðs Sameinuðu þjóðanna.
Íranar taka fleiri af lífi ár hvert en nokkur önnur þjóð nema Kína, samkvæmt mannréttindasamtökum.
