Kjartan Kjartansson, framkvæmdastjóri fjármála- og rekstrarsviðs Eirar, Hamra og Skjóls segir það ekki skylda fyrir ættingja að mæta og sinna garðvinnu á Skjóli. Hjúkrunarheimilið Skjól sé óhagnaðardrifið og um sé að ræða stund sem geti verið gefandi fyrir aðstandendur og starfsfólk.
DV greindi frá því í gær að hjúkrunarheimilið Skjól hefði sent póst á aðstandendur íbúa þar sem óskað var eftir því að þeir sinntu garðverkum. Það er sópa, týna rusl, klippa tré, bera á húsgögn, hreinsa stéttar og setja niður blóm. Gott væri ef fólk gæti komið með skóflur, hanska og fleira að heiman.
Ekki allir voru sáttir við þetta, til að mynda hin 75 ára Charlotta Sverrisdóttir sem mótmælti þessari beiðni. Benti hún á að 95 ára gömul móðursystir hennar væri að borga 600 þúsund á mánuði fyrir dvölina. Skjól gæti keypt garðaþjónustu eins og aðrir. Ætlaði hún ekki að mæta í þessa garðvinnu.
Bæti lífsgæði
Kjartan segir tilganginn með þessari beiðni til aðstandenda sá að fegra umhverfi íbúa fyrir sumarið svo hægt sé að njóta sumarsins og útiveru við hvert tækifæri eins fljótt og hægt er. Einnig að stuðla að góðri samveru við aðstandendur í leiðinni.
„Í nokkur ár hefur komið upp sú umræða meðal starfsfólks hvort ekki væri gaman að koma saman, njóta samveru og fegra umhverfi íbúa og kom upp sú hugmynd að bjóða aðstandendum að taka þátt með okkur, þetta væri góð leið að bjóða aðstandendum að taka þátt, hitta starfsfólk og vinna saman að því sameiginlega markmiði að bæta lífsgæði íbúa,“ segir Kjartan.
Gefandi stund
Nefnir hann að hjúkrunarheimili félagsins séu óhagnaðardrifin. Þau séu heimili einstaklinganna sem þar búa. Ættingjum finnist oftast eðlilegt, sjálfsagt og gott að geta lagt sitt af mörkum við að aðstoða þá við að hlúa að umhverfinu til að geta notið útiveru.
Sjá einnig:
Aðstandendur beðnir að sinna garðverkum á hjúkrunarheimili – „Hún er að borga núna 600 þúsund krónur á mánuði“
„Samverustund sem þessi er ekki skylda – heldur boð til þeirra sem langar að vera með og vilja gera sér glaðan dag með fólkinu sínu, sem býr á hjúkrunarheimili, ásamt starfsfólki,“ segir Kjartan. „Við trúum því að stund sem þessi geti verið aðstandendum og starfsfólki sérlega gefandi.“
Séu neydd til að innheimta fyrir ríkið
Bendir hann á að hjúkrunarheimili landsins fjármögnuð með daggjöldum frá Sjúkratryggingum Íslands. Íbúar greiði ekki beint til hjúkrunarheimilanna fyrir veru sína þar.
Ríkið geri hins vegar íbúum skylt að taka þátt í greiðslu dvalarkostnaðar. Það er að Tryggingarstofnun reikni þátttökuna og sendir svo kröfuna á Sjúkratryggingar Íslands sem dregur upphæðina af daggjöldum viðkomandi hjúkrunarheimilis og felur því að innheimta af íbúum fyrir ríkið.
„Það hefur lengi verið baráttu mál hjúkrunarheimila að losna undan innheimtuhlutverkinu þar sem við teljum að það ætti ekki að vera hlutverk þeirra að standa í innheimtu fyrir ríkið,“ segir Kjartan. „Við sérhæfum okkar í að reka hjúkrunarheimili en erum ekki innheimtufyrirtæki.“
