Finnbjörn A. Hermannsson, forseti Alþýðusambands Íslands, segir mikilvægt að gera upp kosningabaráttuna í aðdraganda þjóðaratkvæðagreiðslunnar. Jón Ólafur Halldórsson formaður Samtaka atvinnulífsins segir jákvætt að niðurstaða sé komin í málið. Nú sé hægt að leggja það til hliðar og einbeita sér að því að ná niður vöxtum og verðbólgu.
„Þetta er bara niðurstaða þjóðarinnar og við það þurfum við að lifa. Lífið heldur áfram og það er komin ákveðin lausn í þetta deilumál þjóðarinnar,“ segir Finnbjörn.
„Hver sagði hvað, hvað var satt og hvað var logið“
Það að það hafi verið svona mjótt á munum hefur þau áhrif að farið verði í ákveðið uppgjör. „Um hver sagði hvað, hvað var satt og hvað var logið í þessari kosningabaráttu,“ segir hann. „Það sem er jákvætt í þessu er að það voru mjög margir sem tóku þátt í umræðunni sérstaklega unga fólkið,“ segir Finnbjörn.
Í framhaldinu verði breiðari umræða um þau þjóðfélagsmál sem voru í brennidepli eins og sjávarútveginn og landbúnaðinn.
Finnbjörn segir mikilvægt að settar verði reglur um gagnsæi fjármögnunar í framhaldinu. „Það er náttúrulega er alveg ljóst að við getum ekki verið með þetta fyrirkomulag. Að ekki sé gefið upp hverjir eru að fjármagna kosningabaráttuna á hvorn veginn sem er,“ segir hann.
„Þannig að það verður náttúrulega bara að ráðast í þá gjörð strax að breyta því fyrirkomulagi. Við munum alveg örugglega ekki fá það upp núna hverjir tóku á sig kostnaðinn í þessari baráttu. En í framhaldinu þá verðum við að hafa þetta allt uppi á borðum,“ segir Finnbjörn.
Niðurstaðan sé sú að hér verði áfram íslensk króna sem, sé að margra mati, dragbítur í íslensku efnahagslífi. „En 40 prósent af heildarveltu samfélagsins í dag eru í evru, vegna fyrirtækja sem gera upp í evru. Það eru smærri fyrirtækin sem gera upp í krónu og Samtök atvinnulífsins og fleiri aðilar hljóta að fara gera athugasemdir við samkeppnismuninn á milli þessara fyrirtækja,“ segir Finnbjörn.
„Ég held að það verði ýmislegt svona þegar við erum búin að gera þetta upp sem muni opna augu okkar hvað við getum gert betur í núverandi ástandi,“ segir Finnbjörn.
Skiptar skoðanir innan atvinnulífsins eins og annarsstaðar
Jón Ólafur Halldórsson, formaður Samtaka atvinnulífsins, segir það mestu máli skipta núna að þetta mál sé frá. „Við sáum í aðdragandanum að það gæti orðið mjótt á munum en nú er komin niðurstaða og hún er bara afgerandi,“ segir Jón.
„Þá er hægt að leggja málið til hliðar og þá getum við snúið okkur að því að vinna hér í efnahagsmálunum; ná niður vöxtum og verðbólgu og það er það sem skiptir lang mestu máli og það gerum við hér heima,“ segir hann.
„Við höfum kannað með reglulegum hætti hug félagsmanna til mögulegrar aðildar undanfarin ár og höfum séð vaxandi andstöðu félagsmanna við mögulega aðild,“ segir Jón Ólafur. „En það eru skiptar skoðanir innan atvinnulífsins eins og í samfélaginu öllu. Það er ekkert öðruvísi hjá okkur en öðrum en þetta er bara staðan og við vinnum með hana,“ segir hann.
„Hef trú á því að við Íslendingar snúum bara bökum saman“
Jón hefur trú á því að það verði sátt um málið í framhaldinu. „Við erum svo sem búin að tala um þetta mál mjög lengi. Já, já ég hef alveg trú á því að við Íslendingar snúum bara bökum saman í þeim verkefnum sem blasa við okkur og það verður núna sem endranær,“ segir Jón Ólafur.
Heldur þú að íslensku atvinnulífi sé betur borgið utan Evrópusambandsins?
„Við eigum þegar í mjög miklu samstarfi við umheiminn. Evrópusambandið, Ameríku og önnur lönd þannig að ég held að við séum bara á góðum stað þar sem við erum,“ segir Jón.
„Við eigum bara að halda áfram að efla útflutning og styrkja stoðirnar. Það er að sjálfsögðu hlutverk stjórnvalda núna að hjálpa okkur við það. Nú ætla þau að fara að leggja fram fjárlög og ég óttast það svolítið að það sé verið að fara boða okkur gjaldhækkanir og skattahækkanir sem gætu orðið íþyngjandi fyrir atvinnulífið,“ segir Jón.
„Sem er afleitt á þessum tíma þegar við þurfum virkilega á því að halda að styrkja stoðirnar og reyna að auka samkeppnishæfni og verðmætasköpun í íslensku atvinnulífi,“ segir Jón Ólafur.
