Benjamín Netanjahú forsætisráðherra Ísraels sakar Navi Pillay, friðarverðlaunahafa Nóbels í ár, um gyðingafordóma. Pillay hefur kallað stríðsrekstur Ísraels á Gaza þjóðarmorð.
Greint var frá því í dag að suðurafríski mannréttindalögfræðingurinn Navi Pillay hlyti friðarverðlaun Nóbels fyrir baráttu sína fyrir mannréttindum og fyrir að sækja til saka þá sem gerast sekir um stríðsglæpi og hópmorð.
Pillay er dómari við Alþjóðlega sakamáladómstólinn og var mannréttindastjóri Sameinuðu þjóðanna um árabil. Hún var áður fyrr formaður alþjóðlegrar rannsóknarnefndar Sameinuðu þjóðanna um stöðu mannréttinda á hernumdu svæðunum í Palestínu.
Nefndin komst að þeirri niðurstöðu í fyrra að Ísrael fremdi þjóðarmorð á Gaza.
Segja Goebbels fagna úr helvíti
Skrifstofa Benjamíns Netanjahú forsætisráðherra Ísraels lýsti því yfir á samfélagsmiðlinum X í dag að dómnefnd friðarverðlauna Nóbels hefði misst siðferðisþrek sitt.
Forsætisráðherrann sakar nefndina um að heiðra manneskju sem sé haldin fordómum og hafi eytt starfsævi sinni í að níða Ísrael. Þá vænir hann Pillay um að skrímslavæða gyðinga.
Utanríkisráðuneyti Ísraels hefur talað í svipuðum dúr og forsætisráðherrann. Það hefur sagt val dómnefndarinnar til marks um hatur í garð Ísraels.
Raunar gekk ráðuneytið svo langt að halda því fram að Joseph Goebbels, áróðursmálaráðherra nasista, hefði fagnað tilnefningunni úr helvíti.
Pillay tileinkaði friðarverðlaunin þolendum alþjóðlegra glæpa.
