Fékk líkamsleifar eiginmannsins og sonar í skókössum
Nærri þremur árum eftir að kafbáturinn Titan féll saman með fimm manns um borð rifjar Christine Dawood upp hvernig hún fékk líkamsleifar eiginmanns síns, Shahzada Dawood, og sonar þeirra, Suleman Dawood.
„Við fengum líkamsleifarnar ekki fyrr en níu mánuðum síðar,“ sagði hún í viðtali við The Guardian. „Og þegar ég segi líkamsleifar þá á ég við það sem eftir var, eins konar massi. Þær komu í tveimur litlum kössum, eins og skókassa.“
Hún bætti við að lítið hefði fundist af leifunum og að þær hefðu verið rannsakaðar af United States Coast Guard. „Það er stór hrúga sem ekki er hægt að aðgreina, allt blandað DNA, og þau spurðu hvort ég vildi fá hluta af því líka. En ég sagði nei, bara það sem þið vitið að er Suleman og Shahzada.“
Slysið átti sér stað í júní 2023 þegar Titan-kafbáturinn féll saman um 90 mínútum eftir að ferð hófst að flaki RMS Titanic. Auk þeirra létust einnig Hamish Harding, Paul-Henri Nargeolet og Stockton Rush.
Christine segir að hún hafi haldið herbergjum eiginmanns síns og sonar óbreyttum frá því þeir hurfu. Lego-líkan Sulemans af Titanic, sem samanstendur af 9.090 hlutum, stendur enn ósnert í glerkassa í eldhúsinu. „Fólk verður oft hissa að sjá það,“ segir hún. „En hvað átti ég að gera? Taka það í sundur? Fela það? Hann eyddi ótal klukkustundum í þetta og hafði mikinn áhuga á Titanic frá því við fórum á stóra sýningu í Singapúr.“
Hún segir sorgarferlið erfitt en að hún hafi lært að takast á við hana. „Ég fer inn í herbergi Sulemans. Stundum er kötturinn sofandi á koddanum hans og þá sest ég á rúmið og leyfi sorginni að koma. Eftir smá stund get ég sett hana til hliðar þar til hún verður aftur yfirþyrmandi.“
Christine, sem býr nú í Surrey með dóttur sinni, segir að hún hafi unnið mikið úr sorginni vegna sonar síns en sé aðeins núna að byrja að syrgja eiginmann sinn. „Þeir eru oft settir saman opinberlega, en þetta eru tvö ólík sambönd. Tvær mjög ólíkar sorgir.“
