Enn einn bikarinn í safnið hjá Karlottu - MBL.IS

„Árið 2003 fór ég í Mosó [í Kjöl eins og klúbburinn hét á þeim tíma] í eitt ár en kom strax heim aftur. Ég var nöppuð yfir en þá var gerð tilraun til að vinna sveitakeppnina.“

Meiri yfirvegun en áður

Karlotta lék 72 holur, eða fjóra hringi, á samtals 303 höggum og segir það stundum hafa verið markmið hjá sér að vera á færri en 300 höggum á meistaramótinu.

„Ég myndi segja að ég hafi verið nokkuð öflug síðustu tvö árin og mætt vel á völlinn. En í mörg ár fór tíminn í barneignir og það sem því fylgir. Þá mætti ég stundum nánast beint á meistaramótið. En á móti kemur að maður þroskast með aldrinum og það hjálpar á golfvellinum. Þegar ég var á fullu í afreksgolfinu á yngri árum var ég ekki nógu stöðug og andlegi þáttur leiksins ekki eins góður. Nú fer maður ekki á hliðina þótt maður geri ein mistök á vellinum en þegar maður var yngri lét maður ein mistök eyðileggja næstu tvær holur fyrir sér. Ég velti því stundum fyrir mér að taka aftur þátt í Íslandsmótinu mér til ánægju en ég hef ekki verið með þar síðan í Kiðjaberginu árið 2010.“

Karlotta þekkir vitaskuld hverja þúfu og hvern hól á Nesvellinum. Vallarmetið sem hún setti í fyrra er vitnisburður um það en þá lék hún á 68 höggum. Spurð að því hvort einhver hola á vellinum hafi reynst henni betur en önnur í gegnum tíðina nefnir hún par 5-braut þar sem Atlantshafið er á hægri hönd.

„Sjöunda holan hefur oft verið fuglahola hjá mér þótt það verði erfiðara ef vindurinn blæs á móti. En við góðar aðstæður á ég kannski bara eftir 6- eða 7-járn til að reyna við flötina í öðru höggi. Það eru tvær eða þrjár holur á vellinum þar sem ég hef ekki náð að fá fugl í sumar.“

Þótt meistaramót golfklúbbanna séu jafnan aðra helgina í júlí þá er það ekki ávísun á veðurblíðu hér á eyjunni. Karlotta segist hafa kynnst nánast öllum útgáfum af veðri á mótinu í gegnum tíðina en oftast hafi líklega verið rok og rigning. „Fyrir tveimur árum var fárviðri á laugardeginum og þá vorum við blautar í gegn,“ segir Karlotta og hlær.