Umfangsmikil fíkniefnaverslun, efnahagsbrot, vopnasmygl og manndrápsfyrirskipanir er meðal þess sem ellefu manns, sem nú verða sviptir dvalarleyfi í Svíþjóð, hafa á samviskunni.
Enginn mannanna er þó í Svíþjóð, í öllum tilfellum er um að ræða háttsetta klíkustjóra eða aðra afbrotamenn á sviði skipulagðrar glæpastarfsemi sem búsettir hafa verið í Svíþjóð um árabil en stýra nú starfsemi sinni – og annarra – frá felustöðum sínum erlendis, í Írak, Líbanon, Tyrklandi, Marokkó, Sameinuðu arabísku furstadæmunum og á Spáni.
„Ég vona að þeir verði svekktir,“ segir Marcus Nilsson við sænska ríkisútvarpið SVT en hann er deildarstjóri þess hluta sænsku landamæralögreglunnar sem starfar innan vébanda lögregludeildarinnar Noa, Nationella operativa avdelning.
Útilokaðir frá sænska velferðarkerfinu
Í upphafi árs tók Noa – sem skipuleggur og framkvæmir stærri verkefni á sviði skipulagðrar glæpastarfsemi, netglæpa, efnahagsbota og alþjóðlegrar samvinnu svo eitthvað sé nefnt – saman nöfn 150 brotamanna úr þessum hópi sem allir eru búsettir erlendis en hafa þó hönd í bagga þegar kemur að brotum sem framin eru í Svíþjóð.
Allir 150 eru ofarlega á forgangslista lögreglu yfir aðila sem hún vill handtaka.
„Með þessu hyggjumst við draga úr áhrifum þeirra í Svíþjóð og þetta er ein okkar aðferða til þess,“ segir Nilsson en með því að afturkalla dvalarleyfin eru viðkomandi útilokaðir frá sænska velferðarkerfinu og þar með sviptir öllum rétti til bóta og lífeyris.
Mennirnir brotlegu munu heldur ekki geta stofnað eða rekið fyrirtæki í Svíþjóð auk þess sem allar ferðir þeirra innan Evrópusambandsins verða torveldaðar. Margir þeirra eiga enn fremur fjölskyldu í Svíþjóð.
Munu eiga á brattann að sækja
„Við eigum öll fjölskyldu, þetta þýðir að þú missir möguleikann á að hitta fjölskylduna eins og þú hafðir ráðgert. Þú gætir verið búinn að hasla þér völl [í Svíþjóð], átt fyrirtæki eða réttindi á borð við ellilífeyri sem þú munt ekki eiga rétt á. Þetta gerir þeim erfitt fyrir á margan hátt,“ útskýrir deildarstjórinn.
Til þess að sænsk innflytjendayfirvöld geti afturkallað dvalarleyfi þurfa viðkomandi að hafa verið með skráða búsetu erlendis lengi eða hafa dvalið lengi erlendis þrátt fyrir sænskt lögheimili. Alls sendi lögregla upplýsingar um fimmtán manns til innflytjendastofnunar landsins, Migrationsverket, og voru skilyrðin til dvalarleyfissviptingar uppfyllt í tilfelli ellefu þeirra.
Þessum ellefu verður nú ómögulegt að snúa aftur til Svíþjóðar.
Geta aðeins snúið til baka í járnum
Fréttamaður SVT spyr hvort þarna sé ekki slegið vindhögg þar sem margir afbrotamannanna ætli sér ekki að snúa aftur til Svíþjóðar og feli sig því í löndum utan Evrópusambandsins.
Nilsson segir svo ekki vera. „Nei, þeir halda sig fjarri vegna þess að við erum að leita að þeim og þá bresta forsendur fyrir varanlegu dvalarleyfi. Þeir munu heldur ekki geta snúið til baka þegar við hættum að leita þeirra,“ segir hann.
Vissulega haldi lögregla áfram að leita mannanna í því augnamiði að fá þeim refsað. „Og þeir geta ekki komið hingað eftir neinum öðrum leiðum [en sem handteknir],“ segir Marcus Nilsson að lokum.
