„Við köllum þetta stærsta leyndarmál stórhöfuðborgarsvæðisins,“ segir Haraldur Ólafsson pípulagningameistari þegar hann lýsir Tjarnabyggð, nýju hverfi í aðeins nokkurra mínútna fjarlægð frá Selfossi. Þar standa bræðurnir Haraldur og Benedikt Ólafssynir, í gegnum fjölskyldufyrirtækið Landheima, að uppbyggingu nýs áfanga undir merkjum Landheima þar sem markmiðið er að skapa skipulagða og vandaða byggð í sveitinni, án þess að fórna nálægð við þjónustu og mannlíf.
„Þetta er eiginlega draumurinn hjá mörgum,“ segir Haraldur. „Að búa í friði og ró, hafa mikið pláss í kringum sig og vera samt bara fimm mínútur frá Bónus.“
Tjarnabyggð er staðsett skammt frá Selfossi og er hluti af stærra skipulögðu svæði þar sem þegar hafa verið byggðir þrír áfangar. Landheimar standa nú að fjórða áfanganum sem verður alls 66 lóðir. Hver lóð er að minnsta kosti einn hektari en þær stærstu fara upp í þrjá hektara.
„Þetta eru allt eignarlóðir þannig að það er engin lóðarleiga og engin gatnagerðargjöld,“ útskýrir Haraldur. „Fólk fær líka mjög miklar byggingarheimildir. Í deiliskipulagi segir að það megi byggja eitt íbúðarhús ásamt útihúsum á hverri lóð og má heildarbyggingarmagn á hverri lóð vera allt að 1.500 fermetrar.“
Pláss fyrir bæði fjölskyldulíf og áhugamál
Auk íbúðarhúsa er gert ráð fyrir fjölbreyttri nýtingu á lóðunum. Þar má meðal annars byggja hesthús, verkstæði, vélaskemmu eða önnur útihús. „Ef þú ert til dæmis iðnaðarmaður og vantar verkstæði fyrir reksturinn þinn þá geturðu haft það á lóðinni,“ segir Benedikt, sem er smiður og að ljúka húsasmíðameistaranámi. „Eða verið með dýrahald, hesta eða bara gæludýr. Þetta er svona blanda af sveitalífi og nútímaþægindum.“
Bræðurnir segja að sífellt fleiri sæki í slíkan lífsstíl, sérstaklega eftir mikla þéttingu byggðar á höfuðborgarsvæðinu. „Ég held að fólk sé orðið þreytt á umferðinni og því að vera alltaf ofan í næsta manni,“ segir Benedikt. „Fólk vill komast í meira næði og hafa meira svigrúm.“
Haraldur býr sjálfur í Tjarnabyggð ásamt eiginkonu sinni og þremur börnum og hann segir fjölskylduna hafa orðið ástfangna af svæðinu um leið.
„Við erum bæði fædd og uppalin í Reykjavík en okkur leið strax vel þarna. Þetta er eins og að vera alltaf aðeins í sveitinni þó að þú sért samt rétt hjá allri þjónustu.“
Fjallahringurinn verður málverkið
Mikil áhersla er lögð á hönnun húsanna og heildarsvip hverfisins. Landheimar vinna með Ask arkitektum að þróun húsanna og stefna að því að byggðin verði bæði samræmd og glæsileg.
„Við viljum að þetta verði fallegt og skipulagt hverfi,“ segir Haraldur. „Á hverju hringtorgi verða sambærileg hús þannig að þetta verði ekki einhver tilviljanakennd blanda af alls konar stílum. Við hugsum þetta svolítið sem lúxusbyggð.“
Fyrsta húsið er þegar risið og hefur vakið athygli fyrir nútímalega hönnun og stórbrotna staðsetningu. Húsið stendur við Norðurslóð 6 og þjónar sem sýningarhús. Þar hefur lóð verið fullfrágengin og stór sólpallur byggður til að sýna hvernig sameina má nútímaþægindi og rólegt umhverfi í sveitinni rétt við Selfoss.
Um er að ræða glæsilegt einingahús frá Einingum ehf. þar sem lögð hefur verið áhersla á gæði, birtu og tengingu við náttúruna. Stórir gólfsíðir gluggar, opin rými og vel útfært skipulag gefa húsinu sérstaka stemningu.
Þetta hús er nú til sölu og á laugardaginn 30. maí milli kl. 14 og 15 verður haldið opið hús fyrir áhugasama kaupendur sem vilja upplifa eignina og svæðið á eigin skinni. „Þetta eru viðhaldslítil og mjög vönduð einingahús sem eru klædd með áli,“ segir Benedikt. „Við höfum lagt mikið upp úr gæðum, bæði í burðarvirki, gluggum og hurðum. Gæðin standast að fullu íslenskar kröfur.“
Húsið er með gólfsíðum gluggum allan hringinn og tæplega 200 fermetra sólpalli sem opnar húsið út í náttúruna.
„Þú þarft eiginlega engin málverk inni í þessu húsi,“ segir Benedikt og hlær. „Það er bara fjallahringurinn sem fegrar veggina. Skipulag húsanna er einstaklega vel heppnað. Það er mjög rúmgóð stofa með mikilli lofthæð og svo sérstök svefnálma þar sem öll herbergin eru saman. Það fer rosalega vel um mann þarna.“
Níu mánuðir frá pöntun til afhendingar
Landheimar bjóða bæði fullkláruð hús og hús á mismunandi byggingarstigum eftir óskum kaupenda. „Ef einhver pantar hús hjá okkur í dag þá gæti það verið tilbúið eftir níu mánuði,“ segir Haraldur. „Þá færðu bara afhenta lykla og getur flutt inn með ferðatöskuna.“
Næsta verkefni er minna hús, um 170 fermetrar, en bræðurnir segja þó að fjölbreyttar stærðir verði í boði. Húsin eru þó öll skipulögð á svipaðan hátt.
Fjölskylduvænt samfélag
Þrátt fyrir að byggðin sé umlukin náttúru er þjónustan aldrei langt undan. Árborg sér um skólaakstur, sorphirðu og snjómokstur og frá Tjarnabyggð liggur upplýstur hjóla- og göngustígur alla leið niður á Selfoss.
„Krakkarnir hjóla oft bara niður á Selfoss,“ segir Haraldur. „Elsti strákurinn minn fer meira að segja stundum bara á vespu.“
Á svæðinu eru einnig upplýstir reiðstígar sem gera hestamönnum kleift að ríða um hverfið árið um kring.
„Þetta er algjör draumastaður fyrir börn,“ segir Benedikt. „Það myndast svo skemmtilegt samfélag þegar krakkarnir eru að leika sér saman og nágrannar verða nánir.“
Byggja heilt hverfi saman
Á bak við verkefnið stendur öll fjölskyldan. Haraldur sér um pípulagnir, Benedikt smíðarnar og faðir þeirra, sem er lögfræðingur, hefur stýrt verkefninu með þeim.
„Við höfum séð um framkvæmdina og uppbyggingu verkefnisins frá upphafi,“ segir Benedikt. „Það hefur verið rosalega gaman að vinna saman að svona verkefni og fylgja því eftir frá skipulagi, hönnun og yfir í það að sjá hverfið taka á sig mynd.“
Haraldur tekur undir það.
„Þetta eru algjör forréttindi. Við njótum þess að vera saman og það er ótrúleg tilfinning að sjá þetta fara úr túni yfir í heilt hverfi.“
Bræðurnir segja að fyrsta húsið hafi gefið þeim enn meiri trú á verkefninu.
„Þegar maður sér húsið standa þarna og ímyndar sér hvernig þetta verður þegar fleiri hús rísa þá fær maður svona extra kraft til að gera þetta vel,“ segir Benedikt.
Haraldur brosir þegar hann lýsir framtíðarsýninni.
„Við viljum að þetta verði stolt Árborgar. Falleg og skipulögð byggð þar sem fólk fær að upplifa það besta úr tveimur heimum: sveitina og borgina.“
