Nýsjálenski leikarinn lést á mánudag, aðeins nokkrum mánuðum eftir að hafa greint frá því að hann væri laus við krabbamein eftir baráttu við sjaldgæft eitlakrabbamein, angioimmunoblastic T-cell lymphoma. Fjölskylda hans lýsti andlátinu sem „skyndilegu og óvæntu“.

Sam Neill greindi frá því í apríl að hann væri laus við sjúkdóminn, fjórum árum eftir greiningu. Lungnabólga er sýking sem veldur bólgu í lungum, getur gert öndun erfiða og í alvarlegum tilfellum verið lífshættuleg.

Leikkonan Rima Te Wiata, sem lék með Neill í kvikmyndinni Hunt for the Wilderpeople árið 2016, sagði í samtali við NZ Herald að hann hefði fengið lungnabólgu skömmu fyrir andlátið.

„Þetta er hræðilegt. Ég er viss um að eins og hann sagði sjálfur einu sinni hafi hann ekki óttast dauðann, en að það myndi pirra hann. Hann hefði líklega sagt: „Æ, í alvöru! Ég sigraði krabbameinið og nú fæ ég lungnabólgu. Hvað kemur næst?“ En nú er hann lagður af stað í sína síðustu ferð.“

Hún minntist jafnframt Neills sem einstaklega næms leikara.

„Til að vera virkilega góður leikari þarftu að kunna að hlusta. Hann hafði frábært innsæi og mikla samkennd. Hann sýndi persónum sínum skilning, jafnvel þegar þær voru erfiðar eða ógeðfelldar.“

Fyrrverandi sambýliskona hans, blaðakonan Laura Tingle, sagði í viðtali við ABC Radio Sydney að ónæmiskerfi hans hefði verið mjög veikt eftir meðferðina.

„Líkaminn hans var einfaldlega orðinn örmagna. Hann hafði verið mjög veikur síðustu vikurnar og allir sem elskuðu hann vonuðust til að hann næði sér enn á ný. En þetta varð einfaldlega of mikið. Hann hafði farið í gegnum mikla lyfjameðferð og ónæmismeðferð sem losaði hann sem betur fer við blóðkrabbameinið, en skildi hann eftir með mjög skert ónæmiskerfi.“

Fjölskylda Neills greindi frá andlátinu í yfirlýsingu á samfélagsmiðlum hans.

„Það er með mikilli sorg sem fjölskylda Sam Neill tilkynnir að hann hafi látist mánudaginn 13. júlí í Sydney í Ástralíu. Sam var umkringdur fjölskyldu sinni og kvaddi með þeirri reisn sem einkenndi allt hans líf. Andlátið var skyndilegt og óvænt, en okkur er huggun í því að hann var laus við krabbamein.“

Neill greindist árið 2022 með þriðja stigs angioimmunoblastic T-cell lymphoma, sjaldgæfa tegund eitlakrabbameins, eftir að hafa fundið fyrir bólgnum eitlum. Hann fékk greininguna á meðan hann var að kynna kvikmyndina Jurassic World Dominion.

Samstarfsmenn minnast Sam

Margir samstarfsmenn hans hafa minnst hans opinberlega. Laura Dern, sem lék Ellie Sattler á móti honum í fyrstu Jurassic Park-myndinni, skrifaði:

„Sam var minn ástkæri vinur alla ævi. Hann sýndi mér hvað hollusta, vernd og ást geta verið djúp, alltaf með sínum einstaka, þurra húmor. Hann var sannur herramaður og draumaprins á hvíta tjaldinu. Ég mun elska þig að eilífu, Dr. Alan Grant.“

Jeff Goldblum, sem lék Ian Malcolm í myndaflokknum, birti myndir af þeim saman og skrifaði: „Næsta stóra ævintýrið hefst nú. Ást, alltaf og að eilífu.“

Leikarinn Joseph Mazzello, sem lék hinn unga Tim Murphy í Jurassic Park, sagði andlátið hafa verið „högg í magann“, en leikstjórinn Steven Spielberg lýsti Neill sem einstökum samstarfsmanni.

„Sam var afar góður samstarfsmaður. Það var ögrun fyrir hann að leika mann sem lét eins og honum þættu börn óþrifaleg, því í raun var hann afar kærleiksríkur faðir. Ég elskaði að vinna með honum við allar Jurassic-myndirnar.“

Anthony Albanese, forsætisráðherra Ástralíu, heiðraði einnig minningu leikarans og sagði hann hafa skipað sérstakan sess í hjörtum Ástrala. Söngkonan Kylie Minogue og leikkonan Daisy Ridley voru einnig á meðal þeirra sem minntust hans á samfélagsmiðlum.