Dagur B. Eggertsson, þingmaður Samfylkingarinnar og fyrrverandi borgarstjóri Reykjavíkur, segir eftirbragðið „súrt“ eftir sveitarstjórnarkosningarnar. Samfylkingin hélt sínum fulltrúafjölda í borginni, hlaut 18,3 prósent atkvæða en það er minnsta fylgi í Reykjavík frá því flokkurinn bauð fyrst fram undir eigin nafni fyrir tuttugu árum.
Dagur var gestur Kastljóss í gærkvöld.
„Ég held að Pétur Marteinsson, okkar nýi oddviti, hafi staðið sig vel og sá hópur sem var á bak við hann. Við byrjuðum með meiri meðvind um mitt vor, vorum að mælast mjög vel í Hafnarfirði, Kópavogi og Reykjavík en gáfum eftir á lokametrunum og þess vegna situr eftir smá súrt eftirbragð.“
Kristrún Frostadóttir, forsætisráðherra og formaður Samfylkingarinnar, sagði í færslu á samfélagsmiðlum í gær nauðsynlegt fyrir flokkinn að byggja aftur upp traust í Reykjavík.
„Þó að flokkurinn hafi haldið sínum fimm fulltrúum í borgarstjórn þá er þetta ljóst. Við tökum það til okkar. Þessi uppbygging hefst hjá nýrri forystu okkar í borginni strax í dag, enda tekur tíma að vinna traust og það getum við aðeins gert með verkum okkar,“ skrifaði Kristrún.
Dagur leiddi borgina í meirihluta frá 2010 og var borgarstjóri í áratug til ársins 2024.
Hann segist finna til ábyrgðar.
„Algjörlega og stolts. Samfylkingin skilur við sig gjörbreytta borg frá því sem áður var. Þetta voru auðvitað sérstakir tímar. Við vorum að taka til eftir hrunið og fórum í gegnum covid en það hafa aldrei verið byggðar jafn margar íbúðir, aldrei meiri fólksfjölgun og aldrei meiri störf sem hafa skapast.“
Hann segir að niðurstöður kosninganna endurspegli fyrst og fremst hægri sveiflu.
„Ég held að allar umræður í aðdraganda kosninganna hafi verið frekar pólaríseraðar og kannski ekki dregið mikið fram þessa meginumbreytingu sem ég held að sé í stórum dráttum býsna mikil sátt um.“
Samfylkingin hefði verið í meirihluta í borginni í sextán ár og það kæmi að því einhvern tímann að flokkurinn stýrði ekki Reykjavík.
„Ég finn fyrst og fremst til stolts gagnvart viðskilnaði Samfylkingarinnar í Reykjavík. Ég veit að nýr og mjög öflugur hópur mun ná vopnum sínum og veita nýjum meirihluta gott aðhald út frá stefnu Samfylkingarinnar.“
Nafn Heiðu Bjargar Hilmisdóttur borgarstjóra var strikað 1.161 sinni af lista Samfylkingarinnar, langoftast af öllum frambjóðendum.
Dagur telur ekki að Heiða hafi verið dragbítur á flokknum.
„Nei, það held ég að sé alls ekki hægt að fullyrða. Þetta tengdist málum sem voru til umræðu rétt fyrir kjördag en er ekki einhver stóridómur um Heiðu.“
Töluverð umræða hefur verið um afskipti Kristrúnar Frostadóttur af kosningabaráttu Samfylkingarinnar.
Ásdís Kristjánsdóttir, bæjarstjóri í Kópavogi, sagði eftir kosningar að það hefði komið henni á óvart hversu mikil afskipti Kristrún Frostadóttir forsætisráðherra hafði af sveitarstjórnarkosningunum í bænum. Það væri forsætisráðherra ekki sæmandi.
Guðlaugur Þór Þórðarsson, þingmaður Sjálfstæðisflokksins, sem var einnig gestur Kastljóss í gær, tók undir orð Ásdísar og var gagnrýninn á framferði hennar í kosningabaráttunni.
„Ég hef aldrei séð forsætisráðherra beita sér með þessum hætti. Hún var með árásir á bæjarstjórann og bæjarstjórnarmeirihlutann í Kópavogi og réðst á Sjálfstæðismenn í Reykjavík. Hún kom á ráðherrabílnum í Ölfus og gekk í hús og sagði fólki að skipta um bæjarstjóra.“ Guðlaugur vill meina að þetta hafi haft neikvæð áhrif á árangur Samfylkingarinnar í kosningunum.
„Ég held að hvorki ég né Guðlaugur Þór séum með einhvern gögn til að staðhæfa þetta,“ segir Dagur.
„Ég held að það hafi verið mikil eftirspurn eftir Kristrúnu víða til að taka slaginn. Hún er vön því að fara um landið. En þetta var líka gagnrýnt, það er alveg rétt. Við sjáum að við gefum eftir á lokametrunum og við þurfum að fara yfir það en ég ætla alls ekki að halda því fram að stuðningur Kristrúnar hafi verið neikvæður. Ég held að hann hafi verið jákvæður að mörgu leyti. En kannski er eitthvað til í því að það hafi slegið í báðar áttir,“ segir Dagur.
Hægt er að hlusta á viðtalið í fullri lengd í spilaranum ofar í fréttinni.
