„Ég er hraust. Ég er ekki með neina af þessum fylgikvillum. Ég er með hátt BMI, ég er með BMI yfir fjörutíu. Ég er með tveggja mánaða gamla blóðprufu þar sem er allt í lagi með mig. Á ég samt að gera þetta?“
Að þessu spyr Brynhildur Björnsdóttir, stjórnandi þáttanna Hold á Rúv, en hún ræddi um þættina og fitufordóma í Morgunútvarpinu á Rás 2 í morgun. Þar segir hún að fitufordómar hafi tekið á sig nýja mynd, feitt fólk sé ekki lengur letingjar heldur sé það veikt. „Nú eru þið að svipta börnin ykkar tíu árum með ykkur ef þið leyfið ykkur að vera feit.“
Líkt og fjallað hefur verið um hefur Alma Möller heilbrigðisráðherra skorið upp herör gegn offitu á Íslandi, þar á meðal að láta Íslendinga hætta að vera feitasta allra Norðurlanda.
Sjá frétt: Þurfti áfallaúrvinnslu eftir fund með Ölmu Möller – „Ég var gerð að engu“
Í þingsályktun ráðherra segir að hægt sé að áætla að 192 þúsund Íslendingar verði of feitir árið 2030. „Þar af muni þrjú þúsund lifa við skerta heilsu, þá eru 189 þúsund of feitir Íslendingar sem verður allt í lagi með,“ segir Brynhildur.
Hún segir mikinn þrýsting vera á fólk að fara á þyngdarstjórnunarlyf eða fara í efnaskiptaaðgerð.
„Það er heilmikil hætta sem fylgir þessum lyfjum og það að fara í þessar aðgerðir hefur varanleg áhrif á líkamann,“ segir hún.
„Líkaminn okkar hefur ekki breyst síðan á steinöld, ef við förum í hraðmegrun og grennumst mjög hratt þá fer hann í panikkástand, gengur á vöðva, allt nema fituforðann sem heldur okkur á lífi sem lengst. Ég held að minnsta kosti 90 prósent þeirra sem grennast svona hratt þyngjast aftur. Þess vegna er talað um að þessi lyf, þú getur ekki hætt á þeim, þú verður að vera á þeim alla ævi. Þá hugsar maður líka, hver græðir á því?“
Sjáist í andlitinu eða tönnunum
Þá hefur gert vart við sig ný tegund fitufordóma.
„Þó þú farir á þessi lyf þá er komin skilgreining, það er hægt að sjá það framan í þér að þú hafir farið á þessi lyf. Það er hægt að sjá það í tönnunum,“ segir hún. „Sumum finnst þú hafa svindlað. Ef þú nærð að grennast þá eigir þú að gera það með því að hugsa rosalega um mataræðið og æfa rosalega mikið, það sé eina leiðin til að ná ásættanlegum árangri.“
Atli Fannar Bjarkason þáttastjórnandi líkti skömminni við notkun á stinningarlyfinu Viagra, en fáir hafa stigið fram opinberlega sem notendur þess. „Það varpar svo miklu kastljósi á þessa fordóma að þú verður að léttast á réttan hátt af því að feitt fólk er, samkvæmt þessum fordómum, latt, gráðugt og vill bara skyndilausnir,“ segir Brynhildur. Hún hefur fengið ýmis viðbrögð við þáttunum, má þar nefna gagnrýni en hún segir: „Ef fólk bregst við og hlustar ekki á þættina, þá sýnir það þessa fordóma sem við erum að tala um.“
