Breytingar háðar huglægu mati - MBL.IS

Þar sagði Pawel m.a. að afstaða íslenskra stjórnvalda væri sú að ekki yrðu gerðar miklar og óafturkræfar breytingar á lögum og stjórnsýslu Íslands í aðildarviðræðum, einungis í þeim tilgangi að laga Ísland að stjórnkerfi Evrópusambandsins.

Skýlir sér á bak við Össur

„Ekki var síður áhugavert hvernig Pawel kaus að skýla sér á bak við fullyrðingar Össurar Skarphéðinssonar þáverandi utanríkisráðherra um meint samkomulag um að engin aðlögun yrði fyrr en eftir að samningur um inngöngu í Evrópusambandið hefði verið samþykktur. Á sama tíma liggur fyrir samkvæmt gögnum sambandsins að gerð var krafa um aðlögun að löggjöf og stjórnsýslu þess í umsóknarferlinu síðast. Þar með talið í köflum sem féllu utan EES-samningsins. Hafi slíkt samkomulag verið til staðar er því ljóst að ekki hefur verið farið eftir því. Morgunblaðið gerði annars fyrr á árinu ítrekað tilraunir til þess að fá afhent gögn frá utanríkisráðuneytinu um hið meinta samkomulag. Loks kom á daginn að engin slík gögn var að finna í ráðuneytinu,“ segir Hjörtur.

Kallað lagfæringar

„Hitt er svo annað mál að Pawel viðurkenndi að til breytinga kynni að koma á löggjöf og stjórnsýslu Íslands samhliða umsóknarferlinu, en sagði að hvorki yrðu gerðar miklar né óafturkræfar breytingar einungis í þeim tilgangi að aðlaga landið stjórnkerfi Evrópusambandsins. Þannig kynni að koma til breytinga, eða lagfæringa eins og hann kallaði þær á öðrum stað í viðtalinu, sem myndu nýtast til dæmis vegna EES-samningsins eða annarra þátt sem ríkisstjórnin teldi skynsamlegt að gera umbætur á, eins og hann orðaði það,“ segir Hjörtur.

Klæddar í búning

„Með öðrum orðum má ljóst vera að slíkar breytingar verði gerðar, en þær verði þá klæddar í þann búning að skynsamlegt sé óháð umsóknarferlinu að gera þær að mati ríkisstjórnarinnar. Með öðrum orðum alfarið háð huglægu mati hennar,“ segir hann.