Yfir ein milljón Breta á aldrinum 16 til 24 ára er hvorki með atvinnu eða í námi. Þetta er í fyrsta sinn síðan 2013 sem þessi tala nær yfir milljón. Ungum Bretum sem teljast iðjulausir fjölgaði um 55 þúsund frá síðasta ársfjórðungi 2025 og fram á fyrsta ársfjórðung þessa árs. Samkvæmt nýrri skýrslu breskra stjórnvalda eru 13,5% Breta í þessum aldurshópi hvorki í vinnu eða námi, eða alls 1.012.000. Þetta er í fyrsta sinn síðan 2013 sem fjöldi þeirra nemur yfir milljón.
Í skýrslunni segir að ef ekkert verður að gert gæti þessi tala náð 1,25 milljón innan fimm ára. Það myndi þýða að einn af hverjum sex í aldursflokknum yrði aðgerðarlaus.
Hafa áhyggjur af því að til verði „týnd kynslóð“
„Við eigum á hættu að til verði „týnd kynslóð“ ef ekkert verður að gert,“ segir skýrsluhöfundurinn Alan Milburn, sem er fyrrverandi heilbrigðisráðherra breska verkamannaflokksins. Von er á tillögum að aðgerðum til að bregðast við stöðunni síðar í ár.
Milburn segir of margt fólk mæta lokuðum dyrum við upphaf fullorðinsáranna. „Margir hinna eldri halda að ef þú fyllir út ferilskrá og skilar henni inn þá eigir þú starf víst. Það hefur breyst,“ segir Milburn.
Forsætisráðherrann segir úrræði til staðar en að bæta þurfi í
Skýrslan var unnin að beiðni Keirs Starmers, forsætisráðherra Bretlands. Hann hefur heitið því að bregðast við ástandinu.
„Þetta er langtímaverkefni. Þetta hefur verið vandamál í mörg ár og er flókið,“ er haft eftir Starmer í umfjöllun Sky. Hann segir ríkisstjórnina þegar hafa sett úrræði á laggirnar sem felst í fjárhagslegum hvötum fyrir atvinnurekendur sem ráða ungt fólk sem hefur verið lengi án atvinnu. „Það eru úrræði til staðar en við þurfum að gera meira,“ segir Starmer.
Í skýrslunni segir að 84% ungs fólks í þessari stöðu vilji vera í vinnu eða þjálfun. Margir eigi þó erfitt með að ná inn á atvinnumarkaðinn. Helsta ástæðan fyrir því er sögð vera mikil fækkun á störfum sem hægt er að vinna um helgar eða ekki krefjast sérfræðiþekkingar, sem og fækkun á lærlingsstöðum.
„Það vantar ekkert upp á viðleitni ungs fólks. Það vantar tækifæri og stuðning,“ segir Milburn.
