Bóndi í Skagafirðinum hefur meðfram bústörfum haldið úti TikTok-aðgangi þar sem hún sýnir frá daglegu lífi í sveitinni. Lambið Soup og kiðlingurinn Kiddi hafa þar borið hæst og er aðgangurinn með rúmlega 100.000 fylgjendur.
„Þetta var ekkert planað, ég hef aldrei litið á mig sem einhvern inflúenser heldur, ég er ekkert að selja neitt. Ég er bara að deila því sem ég geri og var alls ekki að búast við þessu.“
Lilja Haflína Þorkelsdóttir er 26 ára gömul og býr á bænum Víðivöllum í Skagafirði ásamt foreldrum sínum. Fyrir um tveimur árum hóf Lilja að birta myndbönd á samfélagsmiðlum en þá var hún búsett í Lúxemborg. Upphaflega tengdist efnið mat og matarmenningu Íslands en í einu fríinu heima á Íslandi ákvað Lilja að sýna frá búskapnum. Þá fóru hjólin fyrst að snúast.
„Ég byrjaði að pósta einhverju um kindurnar þegar ég var hérna heima og það sprakk, fólk vildi alveg endilega sjá það.“
Markmiðið var aldrei að verða áhrifavaldur segir Lilja, velgengnin kom henni því virkilega á óvart.
Heimsfrægt lamb sem sneri ekki heim
Í byrjun árs 2025 flutti Lilja aftur heim til Víðivalla og brátt var hún komin með 30.000 fylgjendur. Fjöldi fylgjenda jókst þó um rúmlega helming þegar lítið lamb fangaði athygli heimsins.
Lambið Soup, eða Súpa, vakti mikla athygli fyrir belg sinn sem þembdist upp eftir mjólkurdrykkju, líkt og maginn væri yfirfullur af súpu.
„Hann var náttúrulega fyrirburi líka, var lítill þegar hún bar honum, svo var hann alltaf með þessa miklu bumbu, hann var alltaf að drekka mjólk, bara elskaði að drekka mjólk.“
Aðdáendur lambsins nutu þess að sjá myndböndin og segir Lilja að Soup hafi verið einstaklega gæft lamb. Hann var ekki heimalingur en naut þess að láta halda á sér, sem er einstaklega sjaldgæft að sögn Lilju.
„Hann bara vandist því að láta halda á sér og var alltaf rosa rólegur hjá manni. Flest lömb eru ekki þannig. Flest lömb, ef maður tekur þau upp, sprikla og vilja helst komast í burtu.“
En allt kom fyrir ekki, lambið Soup fór á afrétt um sumarið ásamt bústofninum og í göngum um haustið kom heimsfræga lambið ekki í leitirnar. Lilja segir suma fylgjendur hafa átt erfitt með að átta sig á gangi mála, enn í dag fái hún spurningar um afdrif Soup.
„Jú, jú, ég fæ enn þá komment, bara: „Hvar er Soup og hvað gerðist?“ og ég þarf að útskýra þetta nokkrum sinnum, en svona þeir sem eru að followa mig núna hafa verið að svara kommentunum fyrir mig, sem sagt: „Þetta gerðist og þetta.“
Kiðlingurinn Kiddi nýstirni
Á Víðivöllum eru ekki einungis kindur heldur fékk fjölskyldan geitur í jólagjöf. Á bænum eru því 3 geitur og 2 kiðlingar ásamt 600 kindum.
Kiðlingurinn Kiddi, annar kiðlinganna, hefur fetað í fótspor Soup og hlotið frægð á samfélagsmiðlum. Lilja segir fólk ekki jafn háð kiðlingnum og forvera hans Soup.
„Fólk hefur ekki alveg tengst kiðlingnum alveg eins mikið og Soup.“
Nýtilkomnir aðdáendur Kidda þurfa þó ekki að örvænta vegna þess að geiturnar á Víðivöllum fara ekki á fjall ásamt kindunum og líkurnar á því að Kiddi hljóti sömu örlög og Soup því litlar.
„Nei, við ætlum að halda þeim heima. Það eru flestir sem senda geiturnar upp á afrétt líka með kindunum, en það er mjög erfitt að smala geitum. Pabbi hatar að smala geitum, þannig að hann vill frekar hafa þær heima, þó að það geti verið erfitt líka, þetta fer í gegnum allar girðingar og hoppar um allt.“
„Hræðilegt“ að fólk sé farið að kannast við sig úti í búð
Lilja er með rúmlega 100.000 fylgjendur á TikTok-aðgangi sínum Liljasdiary. Flestir fylgjendur eru erlendir aðdáendur en Lilja segir að Íslendingar séu einnig duglegir að fylgjast með. Frægð aðgangsins hefur ekki stigið Lilju til höfuðs sem segir það skrítna tilfinningu að fólk fyrir utan Skagafjörð kannist við hana.
„Já, fólk er farið að þekkja mig úti í búð, mér finnst það alveg hræðilegt.“
Einn daginn stefnir Lilja á að taka við búinu af föður sínum á Víðivöllum en hún segist ekki vilja gera það alveg strax. Samhliða sveitastörfunum vinnur Lilja á Hótel Varmahlíð, þar vinnur hún í fullu starfi í sumar en á veturna eru sveitastörfin í forgangi.
Sauðburði fer senn að ljúka og við tekur sumarseta búfjárins á afrétti. Geiturnar fá þó að vera heima við og hægt er að fylgjast áfram með Lilju og sveitalífinu á TikTok.
