Hildur Björnsdóttir, oddviti Sjálfstæðisflokksins í Reykjavík og verðandi borgarstjóri, hefur misboðið þeim kjósendum sem kusu flokk hennar og tóku þar með þátt í að fella fyrri meirihluta í Reykjavík. Samstarf Sjálfstæðisflokks, Viðreisnar og Framsóknar sé fátt annað en nýr vinstri meirihluti.
Þetta segir Jón Steinar Gunnlaugsson lögmaður í færslu á samfélagsmiðlum. Bendir hann á að Sjálfstæðisflokkur og Miðflokkur hafi fyrir 11 dögum unnið góðan sigur í kosningunum í Reykjavík. Þeim hafi með því tekist að fella vinstri meirihlutann sem stjórnað hefur borginni um langa hríð. Flokkarnir tveir hefðu vel getað náð hreinum meirihluta, 12 fulltrúum af 23.
Hann boðar fjöldaúrsagnir úr Sjálfstæðisflokknum vegna þessa.
„Nú berast þær fréttir að Sjálfstæðisflokkurinn hafi samið við vinstri flokkana, Viðreisn og Framsókn, um meirihlutasamstarf. Ég trúi þessu varla. Kjósendur Sjálfstæðisflokksins hljóta að mótmæla þessu framferði hástöfum,“ segir Jón Steinar.
Þá veltir hann því upp hvort Hildur hafi látið persónulegan kunningsskap sinn við oddvita Viðreisnar ráða för. „Ef Hildur Björnsdóttir vildi sanna að hún væri marktækur stjórnmálaforingi varð hún að fylgja fram augljósum niðurstöðum kosninganna. [...] Með þessu hefur hún misboðið þeim kjósendum sem kusu flokk hennar og tóku þar þátt í að fella fyrri meirihluta. Margir þeirra munu segja sig úr flokknum og ekki kjósa hann í næstu kosningum.“
