Birna Rún passaði upp á að engum leiddist - MBL.IS

Björtuloft í Hörpu voru þéttsetin á dögunum þegar KLAK - Icelandic Startups stóð fyrir Hringiðuhraðal. Hringiða er viðskiptahraðall á vegum KLAK fyrir sprotafyrirtæki með áherslu á grænar lausnir sem skila árangri í umhverfismálum. Þátttakendur hraðalsins fengu tækifæri til að kynna fyrirtæki sín fyrir fjárfestum og gestum úr viðskiptalífinu. Birna Rún Eiríksdóttir leikkona, uppistandari og hlaðvarpsstjarna í Gusunni hélt utan um dagskrána. 

Heiða Björg Hilmisdóttir flutti opnunarerindi og lagði áherslu á mikilvægi þess að styðja við íslenska nýsköpun en það að halda þetta erindi var eitt af hennar síðustu embættisverkum. Ásta Sóllilja Guðmundsdóttir, framkvæmdastjóri KLAK, kynnti Hringiðu og fór yfir árangur hraðalsins síðastliðin ár. Úr honum hefur sprottið fjöldi nýsköpunarfyrirtækja sem leggja hönd á plóg við verðmætasköpun á Íslandi.

Hrönn Greipsdóttir, forstjóri Nýsköpunarsjóðsins Kríu og stjórnarformaður KLAK, og Jenný Ruth Hrafnsdóttir, meðstofnandi og vísisfjárfestir hjá Crowberry Capital voru í pallborði.