Formaður Félags grunnskólakennara er ekki viss um að altækar reglur um símafrí í grunnskólum eigi eftir að skila tilætluðum árangri. Hún segir önnur verkefni meira aðkallandi.
Reykjavíkurborg hefur boðað símafrí sem tekur gildi í öllum grunnskólum borgarinnar í haust auk þess sem mennta- og barnamálaráðuneytið hefur kynnt drög að reglugerð um notkun síma og snjalltækja í grunnskólum.
Mjöll Matthíasdóttir, formaður Félags grunnskólakennara, segir marga grunnskóla nú þegar hafa sett sér reglur í samráði við nemendur sem mikil sátt ríki um. Tilskipanir að ofan gætu flækt málin.
„Skólar hafa verið að setja sér reglur um tækjanotkun með þátttöku nemenda,“ segir Mjöll.
„Nemendur hafa verið þátttakendur og átt mikinn þátt í að móta þær reglur sem víða er búið að setja, ýmist í heilum sveitarfélögum eða einstökum skólum. Ég er þeirrar skoðunar að slík vinnubrögð gefi betri raun en boð að ofan, af því að þá hafa krakkarnir tekið ábyrga afstöðu til reglnanna sem þau eiga svo að fara eftir.“
Hvar eru mörkin?
Hún segir hóp foreldra kalla eftir því að reglur um símanotkun í skólum verði samræmdar. Þetta geti þó valdið auknu álagi innan skólakerfisins..
„Hvar eru mörkin um hlutverk heimila og foreldra í sínu uppeldishlutverki og að setja reglur? Og hvenær á skólinn að taka við? Er það verkefni skólans og kennaranna að standa í svona uppeldi?“ spyr Mjöll.
Kennarar hafa bent á aukið álag sem fylgi fjölgun verkefna sem tengjast námi nemenda ekki beint.
Þá segir Mjöll margt meira aðkallandi fyrir kennara en regluverk um símafrí, til dæmis sé mikill skortur á íslenskum námsgögnum.
„Það er bara brennandi vandamál að útgáfa námsgagna hefur ekki verið fjármögnuð. Þetta veldur miklu álagi í skólastarfi og veldur því að við erum ekki að bjóða börnunum okkar upp á þá gæðamenntun sem þau ættu að fá.“
Hún bendir á að snjallsímar séu dýr tæki sem skólarnir beri ábyrgð á að setja í öruggar geymslur framfylgi þeir símafríi. Því fylgi kostnaður sem hún segist ekki sjá að stjórnvöld ætli að mæta.
