Tár blikuðu á hvörmum fráfarandi borgarfulltrúa á síðasta fundi sitjandi borgarstjórnar sem fram fór í hádeginu, en þar syrgði borgarfulltrúi þá vegferð sem Reykjavíkurborg hefur verið á undanfarin ár og kjósendur höfnuðu í síðustu borgarstjórnarkosningum.
Fundurinn var síðasti borgarstjórnarfundur alls sextán fráfarandi borgarfulltrúa að sinni, en einhverjir þeirra hyggjast gefa kost á sér að fjórum árum liðnum.
Sér ekki eftir starfinu
Undir fyrsta lið dagskrárinnar, sem var umræða um endurskoðun Græna plansins – heildarstefnu Reykjavíkurborgar til ársins 2030 – tók Alexandra Briem til máls og lýsti yfir áhyggjum af því að komandi meirihluti myndi ekki standa við stefnuna þrátt fyrir að hafa að einhverju leyti tekið þátt í mótun hennar.
Þegar leið á málflutninginn færði hún sig yfir á tilfinningalegri nótur.
„Það ætti ekki að koma neinum á óvart að akkúrat núna er ég svolítið leið,“ sagði Alexandra þegar hún ávarpaði borgarstjórn klökk í rómi.
„Ég er að syrgja ákveðna vegferð, ákveðna sýn á það hvernig borgin ætti að vera sem ég upplifi núna að borgarbúar hafi hafnað.“
Hún segist þó ekki sjá eftir því að hafa lagt síðustu átta ár ævi sinnar til borgarstjórnarstarfanna, og hljóti að trúa því að jafnvel þau sem eru ósammála henni í stjórnmálunum efist ekki um að hún hafi lagt sig fram að heimildum á þessum tíma.
Megi ekki fara með almannafé eins og áhættufjármagn
Á eftir henni tók Einar Sveinbjörn Guðmundsson, fráfarandi borgarfulltrúi Flokks fólksins til máls og tók undir þann söknuð sem hún lýsti.
„Það er ákveðinn söknuður fólginn í því að vera að klára þetta tímabil núna, en ég segi bara að það væri gaman að taka þessa umræðu aftur að fjórum árum liðnum, og hver veit nema ég standi þá hér?“
Hann benti þó á að skuldastaða borgarinnar og rekstur hennar væru síður en svo græn, eins og nafn heildarstefnu borgarinnar gefur til kynna, og að meirihluti borgarstjórnar, sem hann sjálfur hefur stutt síðastliðið eitt og hálft ár hafi ekki farið nægilega vel með fjármagnið frá því að Græna planið var samið árið 2020.
„Það er bara þannig með almannafé að við getum ekki notað það með sama hætti og ef um væri að ræða áhættufjármagn eða sprotafyrirtæki eða eitthvað slíkt,“ sagði hann. „Það þurfa að liggja fyrir miklu fyrirsjáanlegri plön og ákveðinn fyrirsjáanleiki varðandi raunhæfa útkomu á því sem lagt er upp með hverju sinni.“
Óskar sér rekstrarmiðaðri borgarstjórn
Kjartan Magnússon, sem setið hefur í borgarstjórn sem óháður fulltrúi eftir að hafa gengið til liðs við Miðflokkinn úr Sjálfstæðisflokknum í mars, tók ekki undir tilfinningasemi annarra ræðumanna sem munu eins og hann yfirgefa borgarstjórnarstólana á komandi kjörtímabili, en fór þess í stað hörðum orðum um rekstur borgarinnar.
„Ef maður hefur eina ósk til verðandi borgarstjórnar þá er það sú að það verði látið af tilgangslausu skrafi og skýrslugerð í einhverjum hópum og betur staðið að almennum rekstri og framkvæmdum.“
Þá sagðist hann undir fjórða lið fundarins er varðaði viðauka við fjárhagsáætlun Reykjavíkurborgar 2026 vilja sjá samantekt á kostnaði við fundarhöld og skýrsluskrif á komandi kjörtímabili, enda væri hann mikill þegar lítilvægum málum væri vísað til hinna ýmsu nefnda sí og æ.
Klökknaði þegar hún kvaddi
Undir síðasta lið fundarins, sem tileinkaður var kveðjuræðum borgarfulltrúa, tóku þau Alexandra Briem, Þórdís Lóa Þórhallsdóttir, Marta Guðjónsdóttir, Þorvaldur Daníelsson, Magnea Gná Jóhannsdóttir, Sabine Leskopf, Aðalsteinn Haukur Sverrisson, Björn Gíslason, Sara Björg Sigurðardóttir, Helga Þórðardóttir, Andrea Jóhanna Helgadóttir, Magnús Davíð Norðdahl og Friðjón R. Friðjónsson til máls og kvöddu borgarstjórn.
Þórdís Lóa Þórhallsdóttir, fráfarandi borgarfulltrúi Viðreisnar, var meðal þeirra sem kváðust engan áhuga hafa á því að snúa sér að borgarstjórnarstörfum að nýju að fjórum árum liðnum.
Sara Björg Sigurðardóttir, fráfarandi borgarfulltrúi Samfylkingar, klökknaði þegar hún kvaddi og minntist málefnanna sem hún hafði sinnt sem borgarfulltrúi í þágu barnanna í Breiðholti og fólks í Reykjavík allri.
Hér að neðan má nálgast fund borgarstjórnar í heild sinni:
