Hringborð norðurslóða, þing Arctic circle hefst í Hörpu í dag. Þar verða um 200 málstofur og um 700 ræðumenn. Meðal annars verður fjallað um áform Bandaríkjanna á norðurslóðum, völd frumbyggja og nýtt geimkapphlaup.
Meðal þess sem er á dagskrá. Í dag ræða Anita Anand, utanríkisráðherra Kanada og Múte B. Egede, utanríkisráðherra Grænlands framtíðina í pallborði.
Katrín Jakobsdóttir er erindreki Hringborðs norðurslóða.
„Ég held nú að það séu ástæður fyrir því að þetta er stærsta norðurskautsráðstefna í heimi. Hingað koma hátt í 2.500 manns til að ræða málin og það eru auðvitað margar ástæður fyrir því,“ segir Katrín.
„Loftslagsbreytingar eru að verða hér á þessu svæði hraðar en annars staðar í heiminum.“
Umhverfismálin í heild séu mjög áberandi í dagskrá þingsins.
Fulltrúar frá 75 löndum
„Það hefur verið mikil spenna á alþjóðasviðinu sömuleiðis undanfarin ár og þau mál eru til umræðu hér og við auðvitað verðum við vör við þá spennu hér á Norðurslóðum.“
Hvað ber hæst í dag?
„Hér verður forsætisráðherra Færeyja að ávarpa þingið og það verður líka gríðarlega áhugavert að heyra frá honum. Síðan munum við heyra frá ráðherrum héðan og þaðan úr heiminum, frá Noregi, Eistlandi, Bretlandi en líka frá Indlandi og Singapúr,“ segir Katrín.
„Það er svo merkilegt að á þessari ráðstefnu þá koma saman fulltrúar frá 75 löndum þannig að við erum ekki bara að ræða þetta hér í okkar hópi hér á Norðurslóðum heldur um heiminn allan.“
