Selma Rán Lima ferðast mikið innanlands en þegar kemur að ferðalögum skiptir félagsskapurinn hana mestu máli. Ef hún gæti farið hvert sem er væru Grænhöfðaeyjar fyrir valinu en hún er ættuð þaðan.
„Ég er hrifin af ferðalögum af öllum stærðum og gerðum. Hvort sem það er stutt skrepp í bústað í hugguleg heit og ró eða langt og ævintýraríkt ferðalag út fyrir landsteinana. Það sem skiptir mig mestu máli í ferðalögum er félagsskapurinn, hann verður að vera góður,“ segir Selma þegar hún er spurð að því hvernig ferðalögum hún er hrifin af.
Í hvernig ferðalög ferð þú í á sumrin?
„Á sumrin þykir mér mikilvægt að komast reglulega út úr bænum. Ég elska að komast í gott færi við náttúruna, dvelja með fjölskyldu og vinum á fallegum slóðum landsins, helst einhvers staðar þar sem ég er ekki reglulegur gestur. Útlandaferðir eru sjaldgæfar á mínu heimili, því miður, en draumurinn væri að komast til annars lands að minnsta kosti einu sinni á hverju sumri.“
Hvert er eftirminnilegasta ferðalag sem þú hefur farið í?
„Eftirminnilegasta ferðalagið mitt var klárlega þegar við leiklistarbekkurinn fórum saman til Lettlands í tvær vikur. Þetta var eins og í bíómynd. Við dvöldum í algjörum ævintýraskógi, lengst úti í sveit, og vörðum öllum okkar stundum í leikgleði og sköpun inni í risastórum kastala. Svo var alltaf hlegið, sungið og dansað langt fram á nótt. Sannkölluð „core memory“ frá leiklistarnáminu.“
Áttu uppáhaldsstað á Íslandi?
„Uppáhaldsstaðurinn minn á Íslandi er Þingvallasveit. Þar á ég margar af mínum bestu minningum frá barnæsku. Þingvallavatn veitir mér ró að því tagi sem ekkert annað á roð í.“
Ertu búin að skipuleggja ferðasumarið 2026?
„Sumarið 2026 verður ekki af verri endanum. Ég er búin að kaupa mér flug til bæði Amsterdam og London. Tvö lönd á einu sumri er talsvert meira en meðaltalið undanfarin ár. Ég ætla ásamt góðra vina hópi í menningarferð með öllu tilheyrandi glensi. Tónleikar, leikhús, söfn og skoðunarferðir munu einkenna þá ferð og ég get ekki beðið. Svo ætla ég að nýta góða veðrið á Íslandi til þess að flakka um firði og sveitir ásamt syni mínum og sambýlingum. Gæðastundir verða þemað þetta sumar.“
Hvert myndir þú fara ef þú gætir farið hvert sem er?
„Ef ég gæti farið hvert sem er myndi ég hiklaust fara til Grænhöfðaeyja. Ég er ættuð þaðan en hef aldrei komið. Mig dauðlangar að kynnast þessum hluta af sjálfri mér, hitta fjölskyldumeðlimi, sjá heimili ömmu minnar og afa sem ég hitti aldrei, kynnast menningunni, borða matinn, dansa við tónlistina, listinn er endalaus. Grænhöfðaeyjar eru efst á ferðaóskalistanum.“
